Երևանում տեղի է ունեցել լուսանկարիչ Դենիս Գրիգորյուկի անհատական ցուցահանդեսի բացումը՝ «Դոնբասն ականատեսի օբյեկտիվով» խորագրով։ Ցուցահանդեսը ներկայացնում է պատերազմական իրականությունը՝ ֆիքսված տասնյակ լուսանկարներում։

Նախաձեռնող լուսանկարիչը նշել է, որ հայերին պատերազմը բացատրելու կարիք չկա, քանի որ իրենք ևս նման ցավի միջով են անցել, հայտնում է Sputnik Արմենիան։

«Չեմ ուզում վշտի չափով «մրցել», երբեք դա կարևոր չեմ համարել։ Վիշտը բոլորի մոտ նույնն է, և, ցավոք, իմ գործը այդ վիշտն արձանագրելն է։ Ցուցահանդեսը մեր ցավի մասին է, այն, ցավոք, չի ավարտվել», - ասել է նա։

Գրիգորյուկը, ով ծնվել և մեծացել է Դոնեցկում, շեշտել է, որ իր նպատակը լուսանկարների միջոցով աշխարհին ցույց տալն է այն գինը, որը վճարում է Դոնբասի բնակչությունը։ Նա վստահեցրել է, որ իր համար կարևորը Ռուսաստանի սահմաններից դուրս մարդկանց ոչ անտարբեր վերաբերմունքն է իրենց ողբերգության հանդեպ։

Ցուցահանդեսի բացման արարողությանը ներկա է եղել Հայաստանում Ռուսաստանի արտակարգ և լիազոր դեսպան Սերգեյ Կոպիրկինը, ով նշել է, որ նախաձեռնությունն օգնում է կոտրել հակառուսական քարոզչության պատն ու ներկայացնել իրականությունը։

«Ես երախտապարտ եմ բոլոր նրանց, ովքեր այսօր եկել են այս ցուցահանդեսին, և վստահ եմ, որ այն իր ներդրումը կունենա, որպեսզի Դոնբասի և Ուկրաինայի տարածքում տեղի ունեցող իրադարձությունների մասին ճշմարտությունը գրավի մարդկանց, այդ թվում հայերի հոգիներն ու սրտերը», - ասաց նա։

Ցուցահանդեսին ներկա է եղել ՌԴ Արտաքին գործերի նախարարության հատուկ հանձնարարությունների դեսպան Ռոդիոն Միրոշնիկը, որը կարևոր ներդրում ունի Դոնբասում և հարակից տարածքներում տեղի ունեցող իրադարձությունների միջազգային լուսաբանման գործում։

«Դոնբասն ականատեսի օբյեկտիվով» ցուցահանդեսը Երևանում իրականացվում է Ռուսական տան նախաձեռնությամբ՝ Մոսկվայի տան աջակցությամբ և բաց է լինելու մինչև ապրիլի 7-ը։

Դենիս Գրիգորյուկի լուսանկարները արդեն ցուցադրվել են Մոսկվայում, Սանկտ Պետերբուրգում, Կալինինգրադում, Դոնեցկում, ինչպես նաև մի շարք եվրոպական երկրներում՝ Իսպանիայում, Իտալիայում, Բելգիայում, Սերբիայում, Գերմանիայում և Բուլղարիայում։