Ապօրինի գույքի բռնագանձման մասին օրենքի սահմանադրականության հարցով գործի քննությունը, որը Սահմանադրական դատարանում երկար ժամանակ է հետաձգվում էր, ի վերջո կվերսկսվի։ ՍԴ-ն կայացրել է աշխատակարգային որոշում՝ վերսկսելու վարույթը և դատաքննության օրը ապրիլի 4-ին նշանակելու մասին։

Այս գործով զեկուցողը Վահե Գրիգորյանն է, ով ընտրվել է Մարդու իրավունքների եվրոպական դատարանի դատավորի պաշտոնում, և մոտ ապագայում պետք է դադարեն նրա՝ ՍԴ անդամի լիազորությունները, գրում է «Փաստինֆոն»։

«Ապօրինի ծագում ունեցող գույքի բռնագանձման մասին» օրենքը ընդունվել է 2020 թվականի ապրիլի 16-ին և ուժի մեջ է մտել մայիսի 23-ին։ Օրենքը բուռն արձագանք է ստացել մասնագիտական շրջանակում՝ մի շարք իրավաբաններ կասկածի տակ են դրել դրա սահմանադրականությունը։ Այս հիմքով ԱԺ ընդդիմադիր պատգամավորները դիմել են ՍԴ՝ օրենքի համապատասխանությունը Սահմանադրությանը ստուգելու համար։

ՍԴ-ն 2022 թվականի հուլիսի 8-ին որոշել է կասեցնել վարույթը՝ խորհրդատվություն ստանալու նպատակով դիմելով Վենետիկի հանձնաժողով։ Դատարանը հանձնաժողովին հղել է չորս հարց, որոնց ստանալուց հետո 2023 թվականի հուլիսի 7-ին ՍԴ-ն սկզբում վերսկսել է վարույթը, ապա նույն օրը կրկին կասեցրել՝ այս անգամ հարցեր ուղղելով ՀՀ գլխավոր դատախազությանը։

Թեև դատախազությունից «Փաստինֆո»-ին հայտնել էին, որ իրենց պատասխանը ՍԴ-ն ստացել է դեռ 2023 թվականին, գործի քննությունն այդպես էլ մոտ մեկ տարի շարունակված չէ։

Այժմ, շուրջ մեկ տարվա ընդմիջումից հետո, գործի կասեցման հիմքերը վերացած լինելով՝ Սահմանադրական դատարանը որոշել է վերսկսել վարույթը և նշանակել քննություն։

Աշխատակարգային մեկ այլ որոշմամբ ՍԴ դատավոր Հրայր Թովմասյանը հայտնել է ինքնաբացարկ՝ հիմնվելով այն հանգամանքի վրա, որ իր և իր փոխկապակցված անձանց նկատմամբ իրականացվում է ապօրինի գույքի բռնագանձման գործընթաց, ինչը կարող է կանխակալ վերաբերմունքի պատճառ դառնալ։

Բացի այդ, ՍԴ-ն՝ զեկուցող Վահե Գրիգորյանի պահանջով, դիմել էր ՀՀ դատական դեպարտամենտին՝ որոշ նյութերի տրամադրման համար։ Սակայն, ուսումնասիրելով այդ նյութերը, դատարանը որոշել է չընդգրկել դրանք գործի մեջ և վերադարձնել դատական դեպարտամենտին։

Այս որոշումը հիմնավորվել է նրանով, որ ներկայացված փաստաթղթերը չունեն գործի ելքի վրա ազդելու նշանակություն, իսկ դրանցում պարունակվող տվյալները կարող են անթույլատրելի միջամտություն դիտվել հիշատակվող անձանց անձնական կյանքի, պատվի և անձնական տվյալների պաշտպանության իրավունքներին՝ Սահմանադրության 31-րդ և 34-րդ հոդվածների շրջանակում։