«Ազատ Եվրոպա/Ազատություն» ռադիոկայանն ապրիլի 1–ից սկսել է հարկադիր արձակուրդի ուղարկել Պրահայի կենտրոնակայանի աշխատակիցներին, քանի որ ԱՄՆ Գլոբալ մեդիայի գործակալությունը (USAGM) չի ուղարկել Կոնգրեսի կողմից հատկացված ապրիլ ամսվա ֆինանսավորումը:

Չնայած այն հանգամանքին, որ մարտի 26-ին USAGM-ը պաշտոնապես չեղարկել է ռադիոկայանի ֆինանսավորման դադարեցման վերաբերյալ իր նախորդ նամակը, այդ պահից ի վեր «Ազատությունը» չի ստացել նախատեսված գումարներից որևէ մաս։ Ընդ որում՝ գործակալությունը մինչ այժմ չի հաստատել «Ազատության» ապրիլ ամսվա ֆինանսական պլանը, թեև այն ներկայացվել է գրեթե երկու շաբաթ առաջ, գրում է «Ազատությունը»։

Ռադիոկայանը դիմել է Վաշինգտոնում ԱՄՆ շրջանային դատարան՝ միջնորդելով կիրառել ժամանակավոր կասեցման որոշում, ինչը կթույլատրի ռադիոկայանին ծախսել իրեն հատկացված միջոցները ապրիլ ամսվա ընթացքում։ Բացի այդ, ներկայացվել է նաև նախնական կարգադրության պահանջ՝ ապահովելու Կոնգրեսի կողմից տարվա մնացած ժամանակահատվածի համար հատկացված ֆինանսավորման փոխանցումը։

«Ազատ Եվրոպա/Ազատություն» ռադիոկայանի նախագահ և գործադիր տնօրեն Սթիվեն Կապուսն ասել է. «Մեր աշխատակիցներն ու նրանց ընտանիքներն են հիմա վճարում դրա գինը, մինչ «Ազատություն» ռադիոկայանը շարունակում է սպասել, թե երբ USAGM-ը մեզ կտրամադրի Կոնգրեսի հատկացրած միջոցները: Ավելի քան յոթ տասնամյակ «Ազատություն» ռադիոկայանն ԱՄՆ ազգային անվտանգության կենսական միջոց է եղել՝ պայքարելով գրաքննության դեմ՝ նորությունները հասցնելով միլիոնավոր մարդկանց աշխարհի ամենաճնշող հասարակություններում»։

Նա հավելել է, որ ռադիոկայանը շարունակելու է դատական գործընթացը մինչև այն պահը, երբ ունենա բավարար երաշխիքներ, որ USAGM-ը կկատարի իր պարտավորությունները՝ ըստ օրենքի փոխանցելով Կոնգրեսի կողմից տրամադրված միջոցները։

«Ազատություն/Ազատ Եվրոպա» ռադիոկայանը կշարունակի մնալ դատարանում այնքան ժամանակ, քանի դեռ մենք բավարար երաշխիքներ չունենանք, որ USAGM-ը կհետևի օրենքին և կուղարկի մեզ այն միջոցները, որոնք Կոնգրեսը հատկացրել է մեզ»։

X սոցիալական հարթակում Սթիվեն Կապուսը գրել է․ «Մենք ստիպված ենք հարկադիր արձակուրդի ուղարկել անձնակազմի մեծ մասին։ ԱՄՆ Գլոբալ մեդիայի գործակալությունը, չնայած հավաստիացումներին, շարունակում է չտրամադրել Կոնգրեսի կողմից հատկացված գործառնական միջոցները: Մենք կենդանի ենք, բայց լսարանին սպասարկում ենք կրճատված անձնակազմով և միջոցներով»:

«Ազատ Եվրոպա/Ազատություն» ռադիոկայանը 1953-ին հիմնադրված անկախ մեդիա կազմակերպություն է, որը ֆինանսավորվում է Միացյալ Նահանգների Կոնգրեսի կողմից՝ USAGM-ի միջոցով:

Մարտի 14-ին ԱՄՆ նախագահ Դոնալդ Թրամփը ստորագրել է հրամանագիր, որով նախատեսվել է զգալիորեն կրճատել USAGM-ի և մի շարք այլ պետական կառույցների գործունեությունը։