Փաստաբան Ռոման Երիցյանը ֆեյսբուքյան իր էջում անդրադարձել է Տիգրան Ուլուբաբյանի գործին՝ ընդգծելով, որ, ինչպես ինքն է ձևակերպում, «օբյեկտիվ քննությունը» շարունակում է ձևական բնույթ կրել։

Նա նշել է, որ Ուլուբաբյանին խոշտանգման ենթարկած ոստիկանների ինքնությունը մինչ օրս չի պարզվել։

«Տիգրան Ուլուբաբյանի գործով «օբյեկտիվ քննությունը» շարունակվում է … .

Քննիչը մերժել է կրկնակի փորձաքննություն իրականացնելու ու ոստիկաններին ճանաչման ներկայացնելու միջնորդությունը։

Մինչև հիմա չեն պարզվել Տիգրանին խոշտանգման ենթարկած, այդ թվում՝ նրա վրա թքած ոստիկանների ինքնությունը։ Ավելին՝ իմ կողմից բացահայտված երկու ոստիկանների վերաբերյալ որևէ որոշում չի կայացվել և նրանց նկատմամբ քրեական հետապնդում չի իրականացվում։

Չարենցավանի ոստիկանությունում կատարված խոշտանգման մեկ այլ դեպքով էլ կարճվել է ոչ միայն քրեական վարույթը, այլև կարգապահականը՝ անձի կողմից իրեն մեղսագրվող արարքը կատարած չլինելու հիմքով»,–ասվում է գրառման մեջ։

Քննչական կոմիտեի Խոշտանգումների և պաշտոնատար անձանց կողմից բռնություն գործադրելով լիազորությունները չարաշահելու կամ անցնելու հանցագործությունների քննության վարչության պետ Շիրազ Գրիգորյանը հայտնել է, որ այս պահին ենթադրաբար ոստիկանների կողմից ծեծի ենթարկված արցախցի երիտասարդ Տիգրան Ուլուբաբյանի ցուցմունքից բացի, որևէ այլ ապացույց գործով ձեռք չի բերվել։

Արցախից տեղահանված 29-ամյա Տիգրան Ուլուբաբյանը մեղադրում է ոստիկանության աշխատակիցներին՝ իրեն խոշտանգելու մեջ։ Նրա պնդմամբ՝ ազգականի տան վրա կատարված ավազակային հարձակումից հետո իրեն են կասկածել, ոստիկանություն հրավիրել «զրույցի», գիշերը պահել բաժնում և վարչության պետի ներկայությամբ դաժան ծեծի ենթարկել, վիրավորել և նվաստացրել։