Ադրբեջանի նախագահ Իլհամ Ալիևը Գերմանիայի նախագահ Ֆրանկ-Վալտեր Շտայնմայերի հետ համատեղ մամուլի ասուլիսում հայտարարել է, որ ՀՀ և Ադրբեջանի միջև խաղաղության համաձայնագրի տեքստն ամբողջությամբ համաձայնեցված է՝ այն բաղկացած է 17 կետից և այստեղ Ադրբեջանը լրացուցիչ պայմաններ առաջ չի քաշում։
Ալիևը, սակայն, անմիջապես ավելացրել է, որ Ադրբեջանի «պահանջները ՀՀ–ին հայտնի են, նոր չեն», գրում է APA-ն։
«Մենք արդեն երկար ժամանակ է առաջ ենք քաշում այդ պայմանները, սակայն դեռևս որևէ լուրջ պատասխան չենք ստացել Հայաստանից։ Որո՞նք են դրանք։
Առաջինը՝ պետք է լուծարվի ԵԱՀԿ Մինսկի խումբը։
Երկրորդ հարցը առնչվում է ՀՀ սահմանադրությանը, որտեղ հղում կա Հայաստանի անկախության հռչակագրին։ Այն սահմանադրության բաղկացուցիչ մաս է»,–ասել է նա՝ կրկնելով այն թեզը, թե ՀՀ սահմանադրության մեջ տարածքային պահանջներ կան Ադրբեջանի հանդեպ։
Ըստ նրա՝ այդ դրույթի հանումը սահմանադրությունից «Բաքվի լեգիտիմ պահանջն է»։
«Այդ երկու պայմանի կատարումից հետո այլևս ոչ մի խոչընդոտ խաղաղության պայմանագրի ստորագրման համար չի լինի։ Ինչպես ասվում է, գնդակը ՀՀ խաղադաշտում է։ Եթե Հայաստանն իրոք ուզում է խաղաղության պայմանագիր կնքել, պետք է ընդունի Ադրբեջանի այդ երկու լեգիտիմ պայմանը»,–ասել է Ալիևը։
Վարչապետ Նիկոլ Փաշինյանը մի քանի անգամ հայտարարել է, որ Հայաստանի և Ադրբեջանի միջև խաղաղության համաձայնագրի նախագիծն արդեն համաձայնեցված է և սպասում է վերջնական ստորագրման։ Նա նշել է, որ Ադրբեջանի նախագահին առաջարկում է նախաձեռնել խորհրդակցություններ համաձայնագրի համաձայնեցված նախագծի ստորագրման շուրջ։
Մարտի 13–ին ՀՀ ԱԳՆ–ն հայտարարել է, որ ընդունել է չհամաձայնեցված 2 հոդվածի վերաբերյալ ադրբեջանական կողմի առաջարկները և որ Խաղաղության համաձայնագիրը պատրաստ է ստորագրման: Նշվում է, որ ՀՀ–ն պատրաստ է խորհրդակցություններ սկսել համաձայնագրի ստորագրման ժամկետների և տեղի շուրջ։ Բաքվից առաջ են քաշել նոր նախապայմաններ և հայտարարել, թե դեռ վաղ է խոսել հանդիպման ժամկետների մասին:
