«Սևան ազգային պարկի» նախկին տնօրենի նկատմամբ հետախուզում է հայտարարվել՝ պետության ունեցվածքի առանձնապես խոշոր չափերով հափշտակության, պաշտոնեական կեղծիքի և փողերի լվացման գործով։

Վ.Գ.-ն, ստանձնելով «Սևան ազգային պարկ» ՊՈԱԿ-ի տնօրենի տեղակալի, այնուհետև՝ տնօրենի պաշտոնը, կազմել է կեղծ հանձնման-ընդունման փաստաթուղթ և այլ անձանց մասնակցությամբ յուրացրել է ՊՈԱԿ-ին պատկանող խոշոր գումար՝ ընդհանուր առմամբ 3 մլն 682 հզր 691 ՀՀ դրամ, հայտնում է Քննչական կոմիտեն։

Հաղորդվում է, որ Վ.Գ.-ի և ՊՈԱԿ-ի կողմից հիմնադրված ընկերության միջև կնքված պայմանագրով նախատեսվել են ցանկապատման ու տնկարանային աշխատանքներ, որոնք փաստացի ամբողջությամբ չեն իրականացվել։ Սակայն կեղծ կատարողականի հիման վրա ներկայացվել է, թե աշխատանքները լիովին կատարված են, ինչի արդյունքում ՊՈԱԿ-ն ամբողջ գումարը փոխանցել է ընկերությանը, իսկ այդ գումարից հափշտակվել է վերը նշված չափով։

Բացի այդ, Վ.Գ.-ն, ծառայողական դիրքը օգտագործելով և մյուսների օգնությամբ, ՊՈԱԿ-ից հափշտակել է ևս 3 մլն ՀՀ դրամ՝ կրկին խոշոր չափերով։

Նախկին տնօրենը կազմել է նաև կեղծ հաշվետվություններ և խարդախությամբ յուրացրել է պետությանը պատկանող առանձնապես խոշոր գումար՝ 20 մլն 405 հզր 214 ՀՀ դրամի չափով։ Այնուհետև նա կատարել է այդ միջոցների լվացում՝ նպատակ ունենալով թաքցնել դրանց հանցավոր ծագումն ու բնույթը։

Վ.Գ.-ի նկատմամբ հարուցվել է քրեական հետապնդում՝ մեղադրանքներ ներկայացվել են Քրեական օրենսգրքի մի քանի հոդվածներով, այդ թվում՝ 256-րդ հոդվածի 2-րդ մասի 2-րդ և 3-րդ կետերով (2 դրվագ), 445-րդ հոդվածի 1-ին մասով (3 դրվագ), 255-րդ հոդվածի 3-րդ մասի 3-րդ կետով, ինչպես նաև 296-րդ հոդվածի 3-րդ մասի 2-րդ և 3-րդ կետերով։

Նրա նկատմամբ որպես խափանման միջոց կիրառվել է կալանք, և հայտարարվել է հետախուզում։

2025 թվականի մարտի 27-ին որոշում է կայացվել Վ.Գ.-ի գործով իրականացնել հեռակա վարույթ։

Քրեական գործը մեղադրական եզրակացությամբ փոխանցվել է վերահսկող դատախազին։

Ծանուցում. Հանցագործության համար մեղադրվողը համարվում է անմեղ, քանի դեռ նրա մեղավորությունն ապացուցված չէ Քրեական դատավարության օրենսգրքով սահմանված կարգով՝ դատարանի՝ օրինական ուժի մեջ մտած դատավճռով: