Ապրիլի 1-ին Երևանում տեղի է ունեցել Եվրամիություն-Հայաստան քաղհասարակության պլատֆորմի հերթական՝ վեցերորդ նիստը, որտեղ բացմանը ելույթ են ունեցել պլատֆորմի համանախագահներ՝ Լուսինե Հակոբյանը («Իրավունքի Եվրոպա միավորում» ՀԿ նախագահ) և Սիմո Տիայնենը (Տնտեսական և սոցիալական եվրոպական կոմիտե)։ Ողջույնի խոսքով հանդես է եկել նաև Եվրոպական սոցիալ-տնտեսական հանձնաժողովի արտաքին հարաբերությունների բաժնի ղեկավար Դիմիտրիս Դիմիտրիադիսը, հայտնում է «Իրավունքի Եվրոպա միավորում» ՀԿ-ն։

Դիմիտրիադիսը իր խոսքում ողջունել է այն փաստը, որ ընդունվել է օրենք, որը վերաբերում է Եվրամիությանը Հայաստանի անդամակցության գործընթացի մեկնարկին։ Նա ընդգծել է, որ ԵՄ-ին անհրաժեշտ են Հայաստանի պես պետություններ, սակայն միաժամանակ նշել է, որ Հայաստանը լուրջ աշխատանք ունի կատարելու այդ ճանապարհին:

Հանդիպման ընթացքում գնահատականներով հանդես են եկել մի շարք պաշտոնյաներ՝ անդրադառնալով Հայաստան-ԵՄ Համապարփակ և ընդլայնված գործընկերության համաձայնագրի (ՀԸԳՀ) իրականացման ընթացքին։ Ելույթներ են ունեցել Հայաստանում ԵՄ պատվիրակության ղեկավար դեսպան Վասիլիս Մարագոսը, ՀՀ ԱԺ եվրաինտեգրման հարցերի հանձնաժողովի ղեկավար Արման Եղոյանը, ԱԳՆ Եվրոպայի վարչության ղեկավար Սամվել Մկրտչյանը, ինչպես նաև Եվրոպական հանձնաժողովի Ընդլայնման և Արևելյան հարևանության գլխավոր տնօրինության Հարավային Կովկասի բաժնի ղեկավար Դեյվիդ Քալլենը։

Դեյվիդ Քալլենը, մասնավորապես, իր խոսքում երկու առանցքային ուղերձ է փոխանցել՝ իշխանություններին կոչ անելով հստակեցնել այն առաջնահերթությունները, որոնց շուրջ Հայաստանը ցանկանում է ստանալ ԵՄ աջակցություն, իսկ քաղհասարակությանը հորդորել է բացահայտ ներկայացնել, թե ԵՄ անդամակցությունը ինչ պատասխանատվություններ կարող է նշանակել Հայաստանի համար՝ զուգահեռ արտահայտելով դրա հնարավոր առավելությունները։

Օրենքի գերակայության, մարդու իրավունքների պաշտպանության, կոռուպցիայի դեմ պայքարի և անվտանգության ոլորտներում ՀԸԳՀ-ի ներդրմանը նվիրված զեկուցումներով հանդես են եկել ՀՀ արդարադատության նախարարի տեղակալ Աննա Կարապետյանը, ՀՀ ՆԳ նախարարի տեղակալ Արմեն Ղազարյանը, Սյուզաննա Սողոմոնյանը (Իրավաբանների հայկական ասոցիացիա), Հասմիկ Հարությունյանը («Իրավունքների պաշտպանություն առանց սահմանների» ՀԿ) և Հովսեփ Խուրշուդյանը («Ազատ քաղաքացի» ՀԿ նախագահ)։

Նրանց ելույթներին հաջորդել է քննարկում, որի ընթացքում շոշափվել են օրակարգային տարբեր հարցեր։

Սոցիալական երկխոսության և աշխատանքային իրավունքների թեմայով զեկույցներով հանդես են եկել Աշխատանքի և սոցիալական հարցերի նախարարի տեղակալ Ռուբեն Սարգսյանը, Հայաստանի արհմիությունների կոնֆեդերացիայի փոխնախագահ Տիրուհի Նազարեթյանը և իրավաբան Աննա Բարիկյանը։

Նիստում քննարկվել են նաև արդյունաբերական և ձեռնարկատիրական քաղաքականության հարցեր։ Այդ թեմայով ելույթներով հանդես են եկել ՀՀ էկոնոմիկայի նախարարի տեղակալ Լիլյա Սիրականյանը, Գործատուների հանրապետական միության ներկայացուցիչ Գագիկ Մակարյանը, Արդյունաբերողների և գործարարների միության փոխնախագահ Ներսես Կարամանուկյանը, ինչպես նաև Եվրոպական տնտեսական և սոցիալական հանձնաժողովի արդյունաբերական փոփոխությունների խորհրդատվական հանձնաժողովի նախագահ Ֆրանչեսկո Պիետրո դե Լոտտոն։

Նիստի ավարտին մասնակիցներն ընդունել են համատեղ հռչակագիր՝ ամփոփելով քննարկման արդյունքներն ու արձանագրելով հետագա համագործակցության հիմնական ուղղությունները։

Փետրվարի 12–ին ՀՀ Ազգային ժողովն առաջին ընթերցմամբ հավանություն է տվել ԵՄ-ին ՀՀ-ի անդամակցության գործընթացի մեկնարկի մասին օրինագծին։ Հայաստանի կառավարությունը հունվարի 9-ին հավանություն է տվել Եվրամիությանն անդամակցելու գործընթաց սկսելու մասին նախագծին, որը ներկայացրել էր «Եվրաքվե» քաղաքացիական նախաձեռնությունը։ Նախագիծն առաջիկայում քննարկվելու է Հայաստանի խորհրդարանում։