Տեղեկատվական վեճերի խորհուրդը հրապարակել է իր գնահատականը՝ քաղաքական գործիչ Էդգար Ղազարյանի գործի շրջանակում սահմանված խափանման միջոցի վերաբերյալ՝ ընդգծելով դրանց անհամաչափությունը։

Նշվում է, որ խափանման միջոցն անհամաչափ է, քանի որ քրեական գործն առնչվում է Սահմանադրական դատարանի դատավորներին, իսկ խափանման միջոցն ընդգրկում է անձանց շատ ավելի լայն շրջանակ, հայտնում է Ինֆորմացիայի ազատության կենտրոնը։

Քաղաքական գործիչ Էդգար Ղազարյանի դեմ քրեական վարույթ է հարուցվել՝ Սահմանադրական դատարանի դատավորների վերաբերյալ հանրային հարթակներում արատավորող բնույթի հայտարարություններ տարածելու մեղադրանքով։ Ղազարյանի նկատմամբ նախ սահմանվել է երկրից չբացակայելու արգելք, որին հետագայում ավելացվել է վարչական հսկողության միջոց՝ արգելելով նրա կողմից հրապարակային ձևով արատավորող բնույթի հայտարարությունների տարածումը ոչ միայն դատավորների, այլև հարկադիր կատարողների, դատախազների, քննիչների, փաստաբանների ու նրանց ազգականների վերաբերյալ։

Խորհուրդը շեշտել է, որ դատավորների կամ դատախազների հասցեին ուղղված հրապարակային քննադատությունը, եթե վերաբերում է հանրային շահերին, չպետք է դիտարկվի որպես քրեական պատասխանատվության հիմք։ Նման սահմանափակումները, ըստ փորձագետների, կարող են վտանգել խոսքի ազատության սկզբունքը։