«Իրավունքի կողմ» ՀԿ նախագահ, տրանսգենդեր Լիլիթ Մարտիրոսյանը բողոք է ներկայացրել ՀՀ գլխավոր դատախազություն Գյումրիի քաղաքապետի թեկնածու Վարդան Ղուկասյանի դեմ, հայտնում է «Հրապարակը»։

«Այսօր դիմել ենք դատախազություն, հաղորդում ենք ներկայացրել հանցագործության մասին: Դեռևս ընթացք չի ստացել, քանի որ այսօր ենք ներկայացրել: Ղուկասյանը պարզ սպանության կոչեր է անում, ատելություն է տարածում մեր մասով: Առանց այդ էլ սև ու սպիտակի է բաժանված ամեն բան, այժմ իրավիճակն ավելի են սրում”,–ասել է նա։

Մարտիրոսյանը հավելել է, որ Վարդան Ղուկասյանն առաջին անգամ չէ, որ թիրախավորում է ԼԳԲՏ անձանց։

«Նա դեռ 2019 թվականին, երբ ես Ազգային ժողովում ելույթ ունեցա, ատելության խոսք էր տարածել ԼԳԲՏ անձանց մասին: Պետք է իրավական գնահատական տրվի, թե ինչո՞ւ է այս մարդը թիրախավորում ԼԳԲՏ անձանց: Նա նաև թիրախ է դարձրել կանանց, անգամ ռասիստական հայտարարություններով է հանդես գալիս: Այդ մարդու խոսքն ամբողջությամբ կազմված է ատելության և թշնամանքի վրա: Լսելով նրա կոչերը, ԼԳԲՏ անձանց կարող են բռնության ենթարկել, մինչև անգամ՝ սպանել»,–ասել է նա։

Ավելի վաղ Վարդան Ղուկասյանը հայտարարել էր, թե քաղաքապետի մեկ այլ թեկնածու Լևոն Բարսեղյանի հետ կոալիցիա չի կազմի, քանի որ նա ԼԳԲՏ-ին է հովանավորում։

«Ինքը ԼԳԲՏ-ին հովանավորում է։ Ով այս երկրում տրանսգենդերներին և մնացած այլասերվածներին տեղ է տալիս, ես միանշանակ դեմ եմ և չեմ ուզում, որ երեխաները փչանան»,-ասել էր Ղուկասյանը։