ՀՀ Զինված ուժերի Գլխավոր շտաբի նախկին պետ, գեներալ-գնդապետ Մովսես Հակոբյանին և ԶՈւ հրթիռային զորքերի ու հրետանու վարչության նախկին պետ, գեներալ-մայոր Արմեն Հարությունյանին մեղադրանք է առաջադրվել քրեական գործի շրջանակում, որի վաղեմության ժամկետն արդեն լրացած է։ Երկու զինվորականներն էլ կտրականապես չեն ընդունել իրենց մեղավորությունը, հայտնում է «Փաստինֆոն»։
Ավելի վաղ հայտնի դարձավ, որ ՀՀ դատախազությունը պահանջ է ներկայացրել Հակոբյանից և Հարությունյանից բռնագանձել մոտ 4.5 միլիարդ դրամ՝ որպես պետությանը պատճառված վնասի փոխհատուցում։ Քաղաքացիական հայցադիմումը մուտքագրվել է Հակակոռուպցիոն դատարան մարտի 17-ին և մակագրվել է դատավոր Լիլի Դրմեյանին։
Մովսես Հակոբյանի փաստաբան Մուշեղ Ալեքսանյանն ասել է, որ իր պաշտպանյալը մեղադրանքը չի ընդունել, հակառակ դեպքում՝ կկարողանար օգտվել վաղեմության հիմքով գործի դադարեցման հնարավորությունից։
«Իրեն մեղսագրվում է այնպիսի գործողություն չկատարել, ինչի իրավունքը չի էլ ունեցել։ Այդ հանգամանքը հաստատված է քրեական գործով»,–նշել է նա։
Ալեքսանյանը հավելել է, որ բողոքարկման արդյունքում նույնիսկ վերացվել է Հակոբյանի նկատմամբ կիրառված խափանման միջոցը։
Նա նաև արձանագրել է, որ գործի հիմքում ընկած հիմնական դրդապատճառը ֆինանսական պահանջն է, մինչդեռ մեղադրանքի իրավական հիմքերը, իր համոզմամբ, թույլ են և հիմնավորված չեն։ Եթե դատարանը կայացնի արդարացման վճիռ, քաղաքացիական հայցը պետք է մերժվի։
Գործի նախաքննությունն անցկացվել է շուրջ հինգ տարի։ Այս ընթացքում թե՛ Հակոբյանը, թե՛ Հարությունյանը հարցաքննվել են վկայի կարգավիճակով։ Արմեն Հարությունյանին մեղադրանք է ներկայացվել այս տարվա հունվարին, սակայն նա ևս չի ընդունել իրեն ներկայացված մեղադրանքը։
Փաստաբան Հակոբ Ենոքյանը ընդգծել է, որ գործի վարույթը խախտել է օրենսդրությամբ սահմանված կարգը՝ քրեական հետապնդումը սկսելով այն պայմաններում, երբ վաղեմության ժամկետը վաղուց լրացած է եղել։ Նրա խոսքով՝ եթե օրենքով սահմանված ժամկետն անցել է, վարույթ իրականացնող մարմինը պարտավոր է քրեական հետապնդում չսկսել, իսկ եթե արդեն սկսվել է՝ ապա դադարեցնել։
Ենոքյանի խոսքով՝ Արմեն Հարությունյանին մեղադրանք է ներկայացվել առանց նախօրոք ճշտելու նրա դիրքորոշումը, ինչը, ըստ նրա, գործընթացի էական խախտում է։
«Ձևական առումով ներկայացվել է մեղադրանք այն պայմաններում, երբ առկա է եղել քրեական հետապնդումը բացառող հանգամանք։ Դա և սկզբունքի խախտում է, և անձի իրավունքների անհամաչափ սահմանափակում
Նույնիսկ, եթե գործը վաղեմությամբ կարճվել էր, ապա քաղաքացիական կարգով պետական շահերի պաշտպանության հարցով հայց է հարուցվել։ Թեև ես դա ենթադրում եմ, մինչ օրս հայցադիմումը չենք ստացել, ենթադրում ենք՝ այս գործին պետք է վերաբերի, որովհետև այլ մեղադրանք կամ պետական շահերին առնչվող, այսպես ասած, խնդիր չունի պարոն Հարությունյանը»,–ասել է նա։
Քրեական գործը, որով այդ պահանջը հիմնավորվում է, օրերս ներկայացվել է Երևանի ընդհանուր իրավասության դատարան և մակագրվել դատավոր Մասիս Մելքոնյանին։
Ըստ մեղադրանքի՝ Արմեն Հարությունյանը 2017 թվականի մայիսից զբաղեցնելով ԶՈւ հրետանու և հրթիռային զորքերի վարչության պետի պաշտոնը՝ ցուցաբերել է անփույթ և անբարեխիղճ վերաբերմունք իր պարտականությունների նկատմամբ՝ խախտելով ԶՈւ ներքին կանոնակարգը, ինչի հետևանքով անզգուշությամբ առաջացել են ծանր հետևանքներ։
Նույնաբովանդակ մեղադրանք է ներկայացվել նաև Մովսես Հակոբյանին։ Ըստ գործի տվյալների՝ նա 2015-2016 թվականներին՝ ՊՆ փոխնախարարի և նյութատեխնիկական ապահովման դեպարտամենտի ղեկավարի պաշտոնում, ցուցաբերելով անփույթ վերաբերմունք, պատշաճ չի կատարել իր ծառայողական պարտականությունները՝ արդյունքում հասցնելով առանձնապես խոշոր չափերի նյութական վնասի։
Հարությունյանի նկատմամբ որպես խափանման միջոց կիրառվել է բացակայելու արգելք, իսկ Հակոբյանի նկատմամբ՝ դրան գումարած 10 մլն դրամ գրավ։
