Վարչապետ Նիկոլ Փաշինյանը կառավարության նիստում հայտարարել է, որ Հայաստանում բոլոր ոլորտներում կա կադրային ճգնաժամ։

«Եթե կարելի է վարորդ լինել՝ չիմանալով մեքենա քշել, ինչո՞ւ չի կարելի լինել կառավարիչ՝ չիմանալով կառավարել, ինչո՞ւ»,- ասել է նա՝ անդրադառնալով վարորդական իրավունք ստանալու կարգին, գրում է Aysor.am-ը։

Փաշինյանը պատմել է, որ ապրիլի 2–ին «Իրական Հայաստան» ծրագրի շրջանակում հանդիպել է քաղաքացիների հետ, և այդ հանդիպման ընթացքում իր մտքում ձևավորվել է մի միտք, որը, ինչպես ինքն է շեշտել, կարող է սադրիչ թվալ։

«Ես հարց տվեցի, ասացի՝ մենք կարո՞ղ ենք ասել, որ Հայաստանում ավտոմեքենա վարող անձանց 70 տոկոսն իրականում չունի մեր ստանդարտներին համապատասխանող այն հմտությունները, որոնք անհրաժեշտ են ավտոմեքենա վարելու համար։ Բոլորը միանգամից ռեակցիա տվեցին ու ասացին՝ 95 տոկոսը։ Ասացի՝ դահլիճում մարդ կա՞, որ չարչարվելով քննություն է հանձնել ու վարորդական իրավունք է ստացել։ Կանայք կային, վերջերս են սկսել պրոցեսի մեջ մտնել ու լավ ծանոթ չունեն, ասացին, որ կտրվել են, չարչարվում են»,- պատմել է նա։

Վարչապետը նշել է, թե երբ վարորդական իրավունք է ստացել, այն ժամանակ հայտնի լրագրող էր, ծնկաչոք աղաչել է՝ չեն թողել քննություն տա։

«300 մետրի վրա բերին տվին, ասին՝ «գնա ստեղից, հնարավորինս շուտ ստեղից գնա, գործ չունես մեր հետ»,–ասել է նա։

Փաշինյանը ընդգծել է, որ նման իրավիճակ ձևավորվել է ոչ միայն տրանսպորտի, այլ նաև պետական կառավարման համակարգում։