Արցախցիները բողոքի ցույց են անում կառավարության շենքի մոտ՝ բարձրաձայնելով իրենց խնդիրները ևւ լուծումներ պահանջելով։

Արցախի ԱԺ պատգամավոր Արամայիս Աղաբեկյանը նշել է, որ Հայաստանի իշխանություններն այնպիսի իրավիճակ են փորձում ստեղծել, որ արցախցիներն այլընտրանք չունենան ու արտագաղթեն` Արցախից հրաժարվել են, հիմա էլ արցախցիներից են հրաժարվում, հայտնում է Aravot.am–ը։

«Պաշտոնական վիճակագրական թվեր են բերում, որ 14-15 հազար արցախցի է հեռացել Հայաստանից։ Այսինքն՝ տեղահանվածների ավելի քան 10 տոկոսն այս պահին լքել է ՀՀ տարածքը։ 12 հազար զինվորական է տեղափոխվել Հայաստանի Հանրապետություն՝ ԱԱԾ աշխատակիցներ, զինվորականներ, սպայակազմ, ՆԳՆ աշխատակիցներ։

Խելքը գլխին առաջարկ է եղել՝ քանի որ այս մարդիկ պատերազմով անցած են, որոշակի փորձառություն ունեն, եկեք ըստ մասնագիտությունների, ըստ առանձին խմբերի եւ ըստ ստորաբաժանումների ինտեգրում իրականացրեք։ Զինվորականներն են դա առաջարկել, բայց դրանից էլ են հրաժարվել։

Այսինքն՝ եթե մենք գալիս ենք այն եզրակացության, որ Արցախից հրաժարվել են, հիմա էլ արցախցիներից են հրաժարվում, իմանանք մեր անելիքը։ Ուրեմն մենք այնպիսի իրավիճակում ենք, որ Հայաստանի Հանրապետության ներկա իշխանությունների հետ ինչ-որ գործառույթ իրականացնելու համար պետք է քաղաքական պարտիզանական պայքար մղենք»,–ասել է նա։

Պատգամավորն ընդգծել է նաև, որ որևէ հույս չունեն, թե իշխանությունները պատրաստ են լսել արցախցիների հնչեցրած պահանջները։

«Ավելին, ես ներքին ինֆորմացիա ունեմ, որ որոշակի փակ շրջանակներում քննարկումներ գնացել են, և իրենք սոցաջակցության ծրագրի որևէ փոփոխություն չեն ուզում իրականացնել։ Ինչ վերաբերում է մեր իրավունքների հարցին, այսօր ընդհանրական են խոսում, որ հայցերի հետքաշում է լինելու, չեն մասնավորեցնում, թե ինչ նկատի ունեն»,- հավելել է նա։

Այն հարցին, թե ինչ գործողություններ պետք է ձեռնարկել, Աղաբեկյանը արձագանքել է, որ եթե համախմբվեն երեք հազար քաղաքացի, ապա կարող են անցնել գործողությունների՝ արգելակելով իշխանությունների ծրագրերի իրագործումը։ Նրա խոսքով՝ անհրաժեշտ է անել հնարավոր ամեն բան, որպեսզի այդ որոշումները չիրագործվեն։

Աղաբեկյանը նաև շեշտել է, որ միայն արցախցիների համախմբումը բավարար չէ, և որ Հայաստանում բնակվող քաղաքացիներն էլ պետք է միանան նախաձեռնությանը։

«Հարցը դրված է այնպես, որ եթե արցախցիների նկատմամբ այս վերաբերմունքը մարսվում է, վաղը-մյուս օրը ՀՀ բնակչության նկատմամբ է նման վերաբերմունք լինելու։ Քննարկումները գնում են վաղը-մյուս օրը կարող է 300 հազար ադրբեջանցիներ գան այստեղ՝ ավելի մեծ իրավունքներով, քան մենք ունենք։ Եվ սա ես այնքան էլ անիրատեսական չեմ համարում»,- նշել է նա։

Մարտի 29-ին կայացած հանրահավաքի ընթացքում Արցախի իրավունքների պաշտպանության խորհուրդը Հայաստանի կառավարությանը պահանջագիր է ներկայացրել։ Ապրիլի 3–ին էլ խորհուրդը հայտարարել է, որ հանդիպում է ունենալու փոխվարչապետ Տիգրան Խաչատրյանի հետ՝ ներկայացված պահանջների քննարկման նպատակով։