Ֆուտբոլի միջազգային ֆեդերացիան հրապարակել է ազգային հավաքականների դասակարգման թարմացված վարկանիշային աղյուսակը, որում Հայաստանի ազգային թիմը նահանջել է՝ երկու հանդիպումներում Վրաստանին պարտվելուց հետո (0-3 և 1-6)։

Հայաստանի հավաքականը նահանջել է 2 հորիզոնականով ու հիմա 102-րդն է համաշխարհային դասակարգման աղյուսակում, հայտնում է «Հետքը»։

Առաջին հորիզոնականում շարունակում է մնալ Արգենտինան, որն աշխարհի գործող չեմպիոնն է։ Նրա հետևում հաջորդաբար տեղ են գրավել Իսպանիան, Ֆրանսիան, Անգլիան, Բրազիլիան, Նիդերլանդները, Պորտուգալիան, Բելգիան, Իտալիան ու Գերմանիան։

2026 թ. աշխարհի առաջնության ընտրական փուլի շրջանակում Հայաստանի թիմը մրցելու է մի շարք հավաքականների հետ, որոնցից Պորտուգալիան այս պահին գտնվում է 7-րդ հորիզոնականում՝ նախորդ վարկանիշի համեմատ իջնելով մեկ տեղով։ Հունգարիան գրանցել է 37-րդ հորիզոնական՝ նահանջելով 7 աստիճանով, իսկ Իռլանդիան պահպանել է իր դիրքը՝ մնալով 60-րդ տեղում։

Հունիսի 6-ին ՀՀ հավաքականը ընկերական հանդիպում է անցկացնելու Կոսովոյի հետ՝ արտագնա խաղում։ Կոսովոյի հավաքականը ներկայում զբաղեցնում է 97-րդ հորիզոնականը՝ բարձրանալով երկու աստիճանով։ Իսկ հունիսի 9-ին մերոնք կհյուրընկալվեն Մոնտենեգրոյի թիմին, որը 73-րդ հորիզոնականում է և չի գրանցել շարժ։

Նախկին ԽՍՀՄ երկրներից ամենաբարձր դիրքը շարունակում է զբաղեցնել Ուկրաինան՝ 25-րդ տեղով։ Նրան հաջորդում են Ռուսաստանը (35), Ուզբեկստանը (57), Վրաստանը (68), Բելառուսը (98), իսկ մնացած նախկին խորհրդային հանրապետությունները Հայաստանից ավելի ցածր դիրքերում են։

ՀՀ անմիջական հարևանների շարքում ամենաբարձր վարկանիշը գրանցել է Իրանը՝ 18-րդ հորիզոնական, Թուրքիան գտնվում է 27-րդ տեղում՝ բարձրանալով մեկ աստիճանով, Վրաստանը՝ 68-րդ հորիզոնականում է, իսկ Ադրբեջանը նահանջել է՝ իջնելով 119-րդ տեղ։

ՖԻՖԱ-ի հերթական վարկանիշային աղյուսակը կհրապարակվի հուլիսի 10-ին։