Կառավարությունն հաստատել է հանրապետության դպրոցների տնօրենների ընտրության կարգի փոփոխությանը վերաբերող նախագիծը։

Ներկայացնելով նախագիծը՝ ԿԳՄՍ նախարար Ժաննա Անդրեասյանը նշել է, որ ներդրվել է նշանակման եռափուլ մեխանիզմ. հավակնորդները նախ մասնակցում են հավաստագրման գործընթացին, հետո ներկայացնում են զարգացման ծրագիր այն հաստատության համար, որտեղ ցանկանում են աշխատել։ Անկախ փորձաքննությունից հետո, մրցութային կարգով ընտրված կազմակերպության կողմից, անցկացվում է հարցազրույց՝ նախարարության ու լիազոր մարմինների համատեղ հանձնաժողովի հետ, հայտնում է Արմենպրեսը։

Նշվել է, որ 2023-ին մեկնարկած գործընթացն ի հայտ է բերել մի շարք խնդիրներ՝ պետական դպրոցների մոտ 32 տոկոսը՝ 437 հաստատություն, անցել է կառավարման նոր մոդելի, սակայն, դրանցից միայն 138-ում է նշանակվել տնօրեն։

Նախարարը նշել է, որ զարգացման ծրագրերի փորձաքննության փուլը կարողանում է հաջողությամբ հաղթահարել հավակնորդների ընդամենը 13 տոկոսը, իսկ հարցազրույցի փուլը՝ մոտ 38 տոկոսը։ Սա, ըստ նախարարի, վկայում է, որ ոլորտում լուրջ կարողությունների բաց է առկա։

Հաշվի առնելով այս հանգամանքը, նախորդ տարվա վերջում «Հանրակրթության մասին» օրենքում կատարված փոփոխություններով թույլատրվել է տնօրեն գործուղել այն հաստատություններ, որտեղ երկար ժամանակով այդ պաշտոնը թափուր է մնում՝ թեկնածուների բացակայության կամ բավարար արդյունքներ չունենալու պատճառով։ Այդ գործուղման կարգը ներկայում գտնվում է հանրային քննարկման փուլում։

Նախարարը հավելել է, որ վերլուծվել են գործող կարգի բարելավման հնարավորությունները։ Ներկայացված նախագիծը նպատակ ունի առավել արդյունավետ և ճշգրիտ սահմանել փորձաքննության ու նշանակման մեխանիզմները՝ հիմնվելով գործնականում արձանագրված խնդիրների վրա։

Նախագծում ներառված է մի քանի կարգավորում։ Ըստ դրանց՝ զարգացման ծրագրի փորձաքննության ընթացքում, եթե ի հայտ գան տվյալների արտահոսքի, շահերի բախման կամ համագործակցության կասկածներ, ապա փորձաքննող կազմակերպության հետ պայմանագիրը կարող է դադարեցվել։ Բացի այդ, եթե թեկնածուն հարցազրույցի փուլը երկու անգամ չի հաղթահարում, ապա նա պետք է նորից ներկայացնի զարգացման ծրագիր, եթե հանձնաժողովը բացասական է գնահատել դրա որևէ բաղադրիչ։

Անդրեասյանը նշել է, որ հաճախ հարցազրույցների ժամանակ պարզվում է՝ թեկնածուն անգամ զարգացման ծրագրի հեղինակ չի հանդիսանում։

Նախագծում ընդգրկված է նաև մի նոր կարգավորում՝ ըստ որի, թեկնածուն կարող է նշանակվել տնօրենի պաշտոնում փորձաշրջանով, եթե հանձնաժողովի առնվազն չորս անդամ դրական եզրակացություն է տալիս։ Սա հնարավորություն կտա գնահատել այն հավակնորդներին, ովքեր ունեն տեսլական, սակայն չունեն բավարար կառավարչական փորձ։

Այդ դեպքում՝ թեկնածուին փորձաշրջանի ընթացքում կուղեկցի մենթոր-տնօրեն, որը կընտրվի համապատասխան ցանկում ներառված փորձառու ղեկավարներից։ Սահմանված են նաև փորձաշրջանի գնահատման պայմաններն ու ընթացակարգերը, և բացասական եզրակացության դեպքում պաշտոնավարումը կդադարեցվի։

Նախարարը նշել է նաև, որ նախագծում ներառվել են գործընթացի թվայնացման բաղադրիչներ, ինչպես նաև մի շարք տեխնիկական հարցերի կարգավորումներ։

«Գտնում ենք, որ ներկայացված նախագիծը կօգնի էապես լավացնել առկա գործընթացը»,- ասել է Անդրեասյանը։

Նիստի ավարտին վարչապետ Նիկոլ Փաշինյանն արձագանքել է՝ նշելով, որ ճգնաժամ է նկատում ոչ միայն կրթական, այլև այլ ոլորտներում ևս, ու անելիքները շատ են։