Հակակոռուպցիոն կոմիտեն հայտնել է, որ ձեռնարկված օպերատիվ-հետախուզական միջոցառումների արդյունքում բացահայտվել են Գյումրիում ընտրակաշառք տալու և ստանալու նոր դրսևորումներ։

Հայտնի է դարձել, որ Գյումրիի ավագանու արտահերթ ընտրություններում մասնակցած կուսակցությունների դաշինքի 71-ամյա թեկնածու կինն ընտրակաշառք է առաջարկել 75-ամյա մի բնակչի՝ դաշինքի օգտին քվեարկող քաղաքացիների ներգրավման պայմանով։ Այդ քաղաքացին դիմել է իր ծանոթներին ու հարազատներին՝ նրանց առաջարկելով մասնակցել ընտրություններին ու քվեարկել նշված դաշինքի օգտին։ Ստացված տվյալներն էլ փոխանցել է թեկնածուին։

Հետաքննության ընթացքում պարզվել է, որ կողմերը միմյանց հետ շփվել են կոդավորված ձևակերպումներով՝ ընտրողներին անվանելով «դասարանցիներ», իսկ «դասերից չբացակայել» արտահայտությամբ ակնարկելով ընտրություններին մասնակցելու ակնկալիքը։

Քննության շրջանակում իրականացված խուզարկությունների արդյունքում հայտնաբերվել են ձեռագիր կազմված ցուցակներ՝ Գյումրիի մի շարք բնակիչների անձնական տվյալներով՝ նշված էին հասցեներ, հեռախոսահամարներ ու ընտրատեղամասեր։ Բացի այդ, մի շարք քաղաքացիներ հարցաքննության ընթացքում հաստատել են իրենց մասնակցությունը նշված գործընթացին՝ համաձայնվելով ստանալ ընտրակաշառք կամ հավաքագրել ընտրողներ։

Դեպքի առնչությամբ հարուցված քրեական վարույթի շրջանակում հիշյալ երկու անձինք ձերբակալվել են և մեղադրվում են ընտրակաշառք տալու ու ստանալու համար։ Նկատի ունենալով նրանց տարիքային և սեռային առանձնահատկությունները, վարույթն իրականացնող մարմինը միջնորդել է կալանքի փոխարեն կիրառել այլընտրանքային խափանման միջոցներ։

Արդյունքում դատարանը նրանց նկատմամբ սահմանել է վարչական հսկողություն, ինչպես նաև մի շարք արգելքներ՝ բնակության վայրը չփոխելու, գիշերային ժամերին այնտեղից չբացակայելու, որոշ անձանց հետ չշփվելու և որոշ վայրեր չայցելելու պայմաններով։

Քրեական վարույթի նախաքննությունը շարունակվում է։ Հակակոռուպցիոն կոմիտեն շարունակում է միջոցառումները՝ դեպքի բոլոր մանրամասները պարզելու և ներգրավված անձանց ամբողջ շրջանակը բացահայտելու նպատակով։

ԿԸՀ-ն ամփոփել է մարտի 30–ին կայացած ՏԻՄ արտահերթ ընտրությունների նախնական արդյունքները, որոնց համաձայն Գյումրիում ոչ մի ուժի չի ստացել մեծամասնության քվեն։ Համայնքի ղեկավար ընտրելու համար քաղաքական կոալիցիաներ կազմելու անհրաժեշտություն կառաջանա։Եթե ընդդիմադիր ուժերը միավորվեն, Գյումրին կունենա ընդդիմադիր քաղաքապետ։

Փարաքարում ընտրություններին մասնակցել է 4 քաղաքական ուժ՝ «Քաղաքացիական պայմանագիր» (Լյուդվիգ Գյուլնազարյան), «Միասնություն» դաշինք (Վալոդյա Գրիգորյան), «Ազգային առաջընթաց» կուսակցություն (Դավիթ Մինասյան) և «Կայունություն» կուսակցություն (Գոռ Սարիբեկյան)։ Առաջատարը «Միասնություն» դածինքն է, որի մաս կազմող «Ապրելու երկիր» կուսակցությունը հայտնել է իր թեկնածուի՝ Վալոդյա Գրիգորյանի հաղթանակի մասին։