3 ապրիլի 2025 - 17:05 AMT
ՀՀ–ն կպարզեցնի 3–րդ երկրներից ներմուծումը` առանց ԵԱՏՄ վերաարտահանման հնարավորության

Եվրամիության երկրներից, ինչպես նաև Շվեյցարիայից, Նորվեգիայից, Հարավային Կորեայից, ԱՄՆ-ից, Ճապոնիայից և Մեծ Բրիտանիայից Հայաստան ներկրվող ապրանքների մուտքը կպարզեցվի, սակայն, դրանք չեն վերաարտահանվի ԵԱՏՄ երկրներ։

Կառավարության նիստում ընդունված որոշման համաձայն՝ վերոնշյալ երկրներում արտադրված ապրանքները կարող են չհանդիսանալ ԵԱՏՄ չափորոշիչներով սերտիֆիկացման ենթակա՝ պայմանով, որ առկա լինեն Հայաստանի և ԵԱՏՄ-ի սահմաններում թույլատրելի վնասակար նյութերի սահմանաչափերին համապատասխանությունը հաստատող փաստաթղթեր, հայտնում է Sputnik Արմենիան։

Վերահսկիչ մարմիններն ունենալով համապատասխան փաստաթղթերը՝ սահմանափակվելու են միայն դրանց ստուգմամբ։ Նույնատիպ ընթացակարգը կիրառվելու է նաև այլ երկրների արտադրանքի համար, եթե վերջինիս սերտիֆիկացումը իրականացվել է ILAC միջազգային համաձայնագրի շրջանակում հավատարմագրված լաբորատորիաների կողմից։

Սակայն, այս կարգավորմամբ ներմուծված ապրանքները հնարավոր չի լինի վերարտահանել ԵԱՏՄ անդամ երկրներ՝ առանց Եվրասիական համապատասխանության սերտիֆիկատ ձևակերպելու։

ՀՀ էկոնոմիկայի նախարարությունը նախկինում նախազգուշացրել է հնարավոր հետևանքների մասին՝ նշելով, որ լաբորատոր փորձարկումների հայտերի քանակը կարող է նվազել, ինչը, իր հերթին, կհանգեցնի փոքր լաբորատորիաների փակման և խոշոր խաղացողների դիրքերի ամրապնդման։

Բացի այդ, նշվել է, որ սահմանային կրկնակի ստուգման բացակայությունը կարող է սահմանափակել արտադրանքի որակի վերահսկումը տեղափոխումից հետո։