Արցախցիների իրավունքների պաշտպանության խորհրդի ներկայացուցիչներին ապրիլի 3–ին կառավարությունում փոխվարչապետ Տիգրան Խաչատրյանի հետ հանդիպմանն ասել են, որ վերադարձ «40+10» աջակցության ծրագրին չի նախատեսվում։

Քննարկումից հետո խորհրդի ներկայացուցիչները ընդգծել են, որ պայքարը շարունակելու են, քանի որ «40+10-ն այլընտրանք չունի», հայտնում է ՍիվիլՆեթը։

Արցախցիների իրավունքների պաշտպանության խորհրդի ներկայացուցիչները հանդիպումից հետո տեղեկացրել են, որ քննարկման առանցքը սոցիալական խնդիրներն են եղել։

Խորհրդի անդամ Մարիամ Աբրահամյանը նշել է, որ հանդիպման ժամանակ կառավարության ներկայացուցիչները խոսել են նոր մշակած ծրագրի մասին:

«Եթե ընտանիքում կա 4 անդամ և ընտանիքի անդամների եկամուտը մեկ շնչի հաշվով 50 հազարից ցածր է, ապա այդ ընտանիքը ստանում է ընդամենը 70 հազար դրամ աջակցություն։ Սա բնականաբար չի լուծում որևէ խնդիր, որի մասին մենք ևս նշել ենք․ մեր պահանջն այն էր, որ 40+10-ն այլընտրանք չունի»,–ասել է նա։

Մեկ այլ ներկայացուցիչ՝ Ապրես Մարգարյանը, փոխանցել է, որ պաշտոնյաներն առաջարկել են բնակարանային ծրագրերի շուրջ ստեղծել փորձագիտական խմբեր։

«Ասել են, որ մեր ձևավորած խմբերը իրենց մասնագիտական խմբերին առաջարկներ կարող են անել, եթե կոնկրետ փաստերով որևէ տեղ հասականան, որ թերացել են, կվերանայեն ծրագիրը»,- ասել է Մարգարյանը։

Հանդիպման ընթացքում մի խումբ արցախցիներ հավաքվել են կառավարության շենքի առջև՝ սպասելով քննարկման արդյունքներին։ Ավարտից հետո նրանք շարժվել են դեպի Ազատության հրապարակ, որտեղ հայտարարել են, որ շարունակելու են իրենց պայքարը և ապրիլի 4-ին կներկայացնեն իրենց հետագա քայլերը։

Ապրիլի 1-ից ուժի մեջ մտած փոփոխություններով՝ էապես նվազեցվել է տեղահանված արցախցիների համար նախատեսված բնակվարձի աջակցության ծավալը։ «40+10» անվանումով ծրագիրը յուրաքանչյուր տեղահանվածի համար ներառում էր ամսական 40,000 դրամ՝ բնակվարձի, և 10,000 դրամ՝ կոմունալ վճարների համար։ Մարտի 29-ին Ազատության հրապարակում կայացած հանրահավաքի ընթացքում, Արցախի շահերի պաշտպանության խորհուրդը հրապարակել է իշխանություններին և միջազգային կառույցներին հասցեագրված 12 կետից բաղկացած պահանջագիր, որի առանցքային պահանջներից էր՝ չկրճատել աջակցության ծավալը և մշակել նոր բնակապահովման ծրագիր։ Նրանք կառավարությանը մեկ շաբաթ ժամանակ են տրամադրել՝ պատասխան ստանալու համար՝ շարունակելով նաև բողոքի տարբեր գործողություններ։