4 ապրիլի 2025 - 15:21 AMT
Պետդեպի խորհրդական․ Թրամփն անհամբեր սպասում է Բաքվի և Երևանի միջև խաղաղ համաձայնագրի ստորագրմանը

ԱՄՆ նախագահ Դոնալդ Թրամփն անհամբեր սպասում է Հայաստանի և Ադրբեջանի միջև խաղաղության համաձայնագրի ստորագրմանը։ Այդ մասին Բաքվում հայտարարել է ԱՄՆ Պետդեպարտամենտի Էներգետիկ ռեսուրսների բյուրոյի ավագ խորհրդական Էրիկ Ջեյքոբսը։

Նա շնորհավորել է կողմերին փաստաթղթի մշակման ավարտի կապակցությամբ և հույս է հայտնել, որ այն շուտով կվավերացվի, հայտնում է APA–ն։

«Սա խթան կհանդիսանա տնտեսական զարգացման համար՝ տարածաշրջանում կայուն խաղաղություն և կայունություն ապահովելու հաշվին։ Կայուն խաղաղությունը վերջ կդնի տարածաշրջանի հակամարտությունների ժամանակաշրջանին և անվտանգություն և բարգավաճում կբերի Հարավային Կովկասին։ Մենք բարձր ենք գնահատում ձեր կատարած քայլերը այս ճանապարհին», — նշել է Էրիկ Ջեյքոբսը։

Ադրբեջանի նախագահ Իլհամ Ալիևը Գերմանիայի նախագահ Ֆրանկ-Վալտեր Շտայնմայերի հետ համատեղ մամուլի ասուլիսում հայտարարել է, որ Ադրբեջանի պահանջները ՀՀ–ին հայտնի են՝ ԵԱՀԿ Մինսկի խմբի լուծարում և ՀՀ սահմանադրության փոփոխում, որում, իբր, «տարածքային պահանջներ կան Ադրբեջանի հանդեպ»։