«Ապրելու երկիր» կուսակցության ղեկավար Մանե Թանդիլյանն իր ֆեյսբուքյան էջում անդրադարձել է Մեծ Բրիտանիայի խորհրդարանի մի խումբ պատգամավորների նախաձեռնությանը, ովքեր նամակով դիմել են իրենց երկրի կառավարությանը՝ դատապարտելով Բաքվում պահվող 23 հայ գերիների կալանավորումը և դատավարությունները։
Թանդիլյանը նշել է, որ միջազգային հանրության< ճնշումների միջոցով է միայն հնարավոր ազդել Ադրբեջանի վրա և ազատել Բաքվի բանտերում գտնվող հայ գերիներին։
«Մեծ Բրիտանիայի խորհրդարանի պատգամավորներ Ջեսիկա Մորդենը, Ջոն Ուիթինգդեյլը, Կրիս Լոունը և Լորդ Մարկ Մաքինսը նամակ են ուղղել Մեծ Բրիտանիայի կառավարությանը, որով խստորեն դատապարտել են Բաքվում պահվող 23 հայ բանտարկյալների շարունակական կալանքը և դատավարությունները և կոչ են արել Մեծ Բրիտանիայի կառավարությանը ճնշում գործադրել Ադրբեջանի վրա՝ նպաստելով հայ բանտարկյալների ազատ արձակմանը։
Պատգամավորները նամակում նշել են, որ Լեռնային Ղարաբաղում ժողովրդավարական ճանապարհով ընտրված իշխանության ներկայացուցիչները կալանավորվել են Ադրբեջանի կողմից Լեռնային Ղարաբաղի դեմ իրականացված հարձակման և մոտ 120,000 հայերի բռնի տեղահանումից հետո։
Նամակի հեղինակները խնդրում են, որ կառավարությունը քննարկի Բաքվում բրիտանական դեսպանության ներկայացուցիչների՝ 23 հայ բանտարկյալներին այցելելու հնարավորությունը։
Շնորհակալություն եմ հայտնում բրիտանացի պատգամավորներին Բաքվում գտնվող մեր հայրենակիցների ազատման հարցը բարձրաձայնելու համար։ Միջազգային հանրության հստակ ճնշումների միջոցով է միայն հնարավոր ազդել Ադրբեջանի վրա և ազատել Բաքվի բանտերում գտնվող հայ գերիներին»,–ասվում է գրառման մեջ։
Մեծ Բրիտանիայի մի խումբ պատգամավորներ դիմել են իրենց կառավարությանը՝ հորդորելով ճնշում գործադրել Ադրբեջանի վրա՝ հայ գերիներին ազատ արձակելու համար։Նամակում մասնավորապես ասվում է. «Մեծ մտահոգություն կա, այդ թվում՝ բանտարկյալների հարազատներից և Մեծ Բրիտանիայում սփյուռքից եկող լուրերի առնչությամբ՝ կապված բանտարկյալների անկախ իրավական աջակցության բացակայության, ֆիզիկական և հոգեբանական խոշտանգումների, ինչպես նաև միջազգային կազմակերպություններին և լրատվամիջոցների ներկայացուցիչներին դատավարություններին հետևելու արգելքի հետ»:
