Պարույր Հովհաննիսյանն ազատվել է ԱԳ նախարարի տեղակալի պաշտոնից: Վարչապետ Նիկոլ Փաշինյանը որոշում է ստորագրել։

«Ղեկավարվելով «Հանրային ծառայության մասին» օրենքի 9-րդ հոդվածի 1-ին մասով՝ Պարույր Հովհաննիսյանին ազատել արտաքին գործերի նախարարի տեղակալի պաշտոնից»,- ասվում է որոշման մեջ:

Հովհաննիսյանը փոխնախարար է նշանակվել 2021 թվականի նոյեմբերի 9-ին։

Ըստ որոշ լրատվամիջոցների, Պարույր Հովհաննիսյանը նշանակվելու է ՄԱԿ-ում ՀՀ մշտական ներկայացուցիչ։

1998-2001 թվականներին Պարույր Հովհաննիսյանը ծառայել է որպես երրորդ քարտուղար ՄԱԿ-ում Հայաստանի մշտական ներկայացուցչությունում, այնուհետև նշանակվել է երկրորդ քարտուղար։ 2001-2005 թվականներին ղեկավարել է ԱԳՆ միջազգային տնտեսական համագործակցության վարչության՝ միջազգային տնտեսական կազմակերպությունների բաժինը։ Իսկ 2005-2010 թվականներին զբաղեցրել է ՀՀ առաքելության ղեկավարի տեղակալի պաշտոնը Եվրոպական միությունում։