Արցախցիների իրավունքների պաշտպանության խորհրդի անդամները ապրիլի 4–ի երեկոյան կհայտարարեն իրենց հետագա գործողությունների մասին։ Այդ մասին տեղեկացրել է խորհրդի անդամ Ապրես Մարգարյանը, գրում է «Փաստինֆոն»։

Նախատեսվում է, որ ժամը 17։00-ի սահմաններում խորհրդի անդամները կրկին կհավաքվեն, կվերջնականացնեն իրենց որոշումը ու ժամը 19-ի սահմաններում արդեն կհրապարակեն։

Ապրիլի 3–ին տեղի է ունեցել ՀՀ փոխվարչապետ Տիգրան Խաչատրյանի հանդիպումը արցախցիների երեք հոգանոց պատվիրակության հետ։ Քննարկման առարկան հանդիսացել է մարտի 29-ի հանրահավաքում ներկայացված պահանջագրի՝ բացառապես սոցիալական մասը։

Ինչպես արդեն հաղորդվել է, ապրիլ ամսից Հայաստանի կառավարությունը դադարեցրել է արցախցիների համար նախկինում գործած 40+10 աջակցման ծրագիրը։ Այս որոշումը լրջորեն ազդել է տեղահանված բնակչության սոցիալական վիճակի վրա՝ թողնելով նրանց փաստի առաջ։

Արցախցիների պահանջների առանցքում մնում է իրենց վերադարձի իրավունքի օրակարգային ընդգրկումը։ Քանի դեռ այդ իրավունքը չի իրացվել, նրանք պահանջում են ժամանակավոր բնակարանների տրամադրում՝ առանց սեփականության իրավունքի, կամ 40+10 ծրագրի վերականգնում։

Փոխվարչապետի հետ հանդիպման արդյունքներից խորհրդի անդամները դժգոհ են մնացել, քանզի փոխվարչապետը նշել է, որ 40+10 ծրագրին վերադարձ չի լինելու։ Մտավախություն կա, որ նման քայլերով կառավարությունը պատճառ կդառնա արցախցիների արտագաղթին նաեւ Հայաստանից։ Բռնի տեղահանված արցախցիները, որոնց անվտանգության երաշխավորն է հանդիսանում Հայաստանը, հայտարարել են, որ վճռական են տրամադրված ու կդիմեն գործողությունների՝ իրենց իրավունքների պաշտպանության համար։

Ապրիլի 1-ից ուժի մեջ մտած փոփոխություններով՝ էապես նվազեցվել է տեղահանված արցախցիների համար նախատեսված բնակվարձի աջակցության ծավալը։ «40+10» անվանումով ծրագիրը յուրաքանչյուր տեղահանվածի համար ներառում էր ամսական 40,000 դրամ՝ բնակվարձի, և 10,000 դրամ՝ կոմունալ վճարների համար։ Մարտի 29-ին Ազատության հրապարակում կայացած հանրահավաքի ընթացքում, Արցախի շահերի պաշտպանության խորհուրդը հրապարակել է իշխանություններին և միջազգային կառույցներին հասցեագրված 12 կետից բաղկացած պահանջագիր, որի առանցքային պահանջներից էր՝ չկրճատել աջակցության ծավալը և մշակել նոր բնակապահովման ծրագիր։ Նրանք կառավարությանը մեկ շաբաթ ժամանակ են տրամադրել՝ պատասխան ստանալու համար՝ շարունակելով նաև բողոքի տարբեր գործողություններ։