2024-2025 թթ․ ձմեռը Հայաստանի հիդրոօդերևութաբանական դիտարկումների պատմության մեջ ամենաչորն է եղել՝ սկսած 1935 թվականից։ Այդ մասին հայտարարել է ՀՀ շրջակա միջավայրի նախարարության «Հիդրոօդերևութաբանության և մոնիթորինգի կենտրոնի» տնօրեն Լևոն Ազիզյանը։

Ըստ Ազիզյանի ներկայացրած տվյալների՝ ձմռան ընթացքում հանրապետության տարածքում տեղումների միջին քանակը կազմել է 55 մմ, ինչը կազմում է բազմամյա նորմայի ընդամենը 49 տոկոսը, հայտնում է Արմենպրեսը։

«Հատկապես չոր է եղել հունվարը, երբ ամսական միջին տեղումների քանակը կազմել է նորմայի 18 տոկոսը։ Այն երկրորդ չոր հունվարն է եղել 1999 թվականից հետո։ Ինչ վերաբերում է ձևավորված ձնածածկույթին, ապա 2025 թվականի մարտի 25-ի դրությամբ ձնածածկույթ առկա է եղել միայն 1800 մետրից բարձր շրջաններում, բացառությամբ Լոռու, Տավուշի առանձին հատվածներում։ Արագած բարձր լեռնային կայանի տվյալների համաձայն, որը գտնվում է 3229 մետր բարձրության վրա, ձնածածկույթը կազմել է 168 սմ, ինչը 40-50 սմ-ով ցածր է նախորդ տարվա ցուցանիշից»,-ասել է Ազիզյանը։

Մասնագետների կանխատեսմամբ՝ ձմռան ընթացքում կուտակված ձյան պաշարների սակավության պատճառով գարնանային վարարումների հոսքի ծավալները կլինեն նորմայից ցածր՝ կազմելով մոտավորապես մինչև 90 տոկոս։

Հոսքի առավելագույն ցուցանիշները, ըստ գնահատումների, կդիտվեն մայիսի առաջին և երկրորդ տասնօրյակի ընթացքում։ Բացի այդ, Լևոն Ազիզյանը նշել է, որ ջերմաստիճանի կտրուկ բարձրացման և ուժեղ անձրևների պարագայում հնարավոր են գետերի մերձափնյա տարածքների ժամանակավոր ջրածածկումներ։