Հայաստանի մարդու իրավունքների պաշտպանի աշխատակազմի ներկայացուցիչները «Նուբարաշեն» ՔԿՀ այցի ընթացքում արձանագրել են ազատությունից զրկված անձանց մարմնական վնասվածքները: Արձանագրվել է, որ ազատությունից զրկված անձանց ցուցաբերվում է բժշկական օգնություն, այդ թվում՝ 2 անձի մոտ առկա վնասվածքների կասկածի կապակցությամբ կատարվել է նաև ռենտգեն հետազոտություն, հայտնում է ՄԻՊ գրասենյակը։

Ապրիլի 3-ին իրավապաշտպան Ժաննա Ալեքսանյանը սոցցանցի իր էջում հայտնել է, որ «Նուբարաշենում» ցմահ դատապարտյալների նկատմամբ բռնություն է գործադրվել։ Այս հայտարարությունից հետո ՄԻՊ գրասենյակը տեղեկացրել է, որ արձագանքման արագ խումբ է մեկնել հիմնարկ։

ՄԻՊ ներկայացուցիչներն առանձնազրույց են ունեցել ազատությունից զրկված մոտ 30 անձանց, այդ թվում՝ ցմահ դատապարտյալների և կալանավորված անձանց հետ, շրջայց կատարել խցերում, ուսումնասիրել ազատությունից զրկված անձանց վերաբերյալ կազմված փաստաթղթերը:

Առանձնազրույցների ընթացքում ազատությունից զրկված անձանցից ոմանք Պաշտպանի ներկայացուցիչներին, ի թիվս այլնի, տեղեկություններ են ներկայացրել նույն օրը քրեակատարողական ծառայության հատուկ նշանակության բաժնի ծառայողների կողմից գործադրված, իրենց պնդմամբ, անհամաչափ ֆիզիկական ուժի, խցերում առկա գույքը կոտրելու, իրենց նկատմամբ վիրավորանքներ և հայհոյանքներ հնչեցնելու մասին: Ազատությունից զրկված անձինք պնդել են, որ այրվել են ոչ թե խցերի ներքնակները, այլ մեկ սրբիչ:

Այցի ընթացքում ստացված տեղեկություններն ու արձանագրված խնդիրները ներկայում ամփոփվում են:

Ավելի վաղ Քրեակատարողական ծառայությունից հայտնել էին, որ «Նուբարաշեն» ՔԿՀ–ում դատապարտյալներից մեկը պարբերաբար ներկայացնում է անօրինական պահանջներ և հրահրում այլ ազատազրկված անձանց նույնպես ներկայացնել նման անօրինական պահանջներ։ Որոշվել է անօրինականություններ ու պառակտում հրահրող դատապարտյալին տեղափոխել այլ ՔԿՀ՝ հաջակցություն վերջինիս՝ որոշ կալանավորված անձինք և ցմահ դատապարտյալներ դրսևորել են անհնազանդություն, վնասել են խցերի գույքը, այրել ներքնակները, հարվածել դռներին և այլն։

«Ծառայության հատուկ նշանակության բաժնի ծառայողները «Նուբարաշեն» քրեակատարողական հիմնարկի ծառայողների հետ համատեղ ձեռնարկել են հատուկ միջոցառումներ ազատազրկված անձանց կողմից ներքին կանոնակարգի խախտումները վերացնելու ուղղությամբ։ Ֆիզիկական ուժի գործադրմամբ վերջիններս դուրս են բերվել խցերից, իսկ խցերում իրականացվել են խուզարկություններ»,–ասվում էր հաղորդագրության մեջ։