«Մայր Հայաստան» դաշինքի կողմից Գյումրու ավագանու արտահերթ ընտրություններին առաջադրված թեկնածու Կարեն Սիմոնյանը հայտարարել է, որ դաշինքն ընտրություններին մասնակցում էր՝ նվազագույն քաղաքական նպատակ ունենալով իշխանազրկել «Քաղաքացիական պայմանագրին», իսկ առավելագույնը՝ քաղաքի կառավարման ղեկը ստանձնելը: Նա այդ մասին գրառում է արել ֆեյսբուքյան իր էջում։

Նա նշել է, որ կոալիցիա չեն կազմում՝ քվեարկում են հանուն ՔՊ-ի իշխանազրկման:

«Մենք քարոզարշավից առաջ հրապարակել էինք մեր սկզբունքները և մեկ միլիմետր անգամ չենք շեղվել այդ սկզբունքներից: Ուրախ եմ, որ անցողիկ շեմը հաղթահարած «Մեր քաղաքը» դաշինքը վերջապես հրապարակեց իր որոշումը: Սա համարում եմ բոլորիս հաղթանակը:

Այս պահին կարող եմ ասել, որ մենք նպաստեցինք, որպեսզի «Մայր Հայաստանի» նվազագույն խնդիրը՝ ՔՊ-ի իշխանազրկումը, իրականություն դառնա և ժողովրդի պահանջը կյանքի կոչվի: Ուզում եմ հատուկ նշել, որ մենք ոչ թե կոալիցիա ենք կազմում կամ պաշտոնների սակարկության մեջ մտնում, այլ քվեարկում ենք՝ հանուն ՔՊ-ի իշխանազրկման:

Մեր հետագա գործունեությունը քաղաքապետարանում և դրանից դուրս բխելու է բացառապես մեր այն ծրագրերից, որոնց համար քվե ենք ստացել և որոնք բխում են Գյումրու, գյումրեցիների շահերից»,–նշել է նա։

ԿԸՀ-ն ամփոփել է մարտի 30–ին կայացած ՏԻՄ արտահերթ ընտրությունների նախնական արդյունքները, որոնց համաձայն Գյումրիում ոչ մի ուժի չի ստացել մեծամասնության քվեն։ Համայնքի ղեկավար ընտրելու համար քաղաքական կոալիցիաներ կազմելու անհրաժեշտություն կառաջանա։Եթե ընդդիմադիր ուժերը միավորվեն, Գյումրին կունենա ընդդիմադիր քաղաքապետ։

Փարաքարում ընտրություններին մասնակցել է 4 քաղաքական ուժ՝ «Քաղաքացիական պայմանագիր» (Լյուդվիգ Գյուլնազարյան), «Միասնություն» դաշինք (Վալոդյա Գրիգորյան), «Ազգային առաջընթաց» կուսակցություն (Դավիթ Մինասյան) և «Կայունություն» կուսակցություն (Գոռ Սարիբեկյան)։ Առաջատարը «Միասնություն» դածինքն է, որի մաս կազմող «Ապրելու երկիր» կուսակցությունը հայտնել է իր թեկնածուի՝ Վալոդյա Գրիգորյանի հաղթանակի մասին։