Հայաստանը ընտրվել է ՄԱԿ-ի երեք կառույցի ղեկավար մարմնի անդամ։ Ապրիլի 4-ին ՄԱԿ-ի Տնտեսական և սոցիալական խորհրդում կայացած ընտրությունների արդյունքում Հայաստանը ստանձնել է ՄԱԿ-ի Զարգացման ծրագրի (UNDP), Բնակչության հիմնադրամի (UNFPA) և Ծրագրերի իրականացման գրասենյակի (UNOPS) գործադիր խորհրդի անդամի կարգավիճակ՝ 2026-2028 թվականների համար, հայտնում է ՀՀ մշտական ներկայացուցչությունից ՄԱԿ-ում։

«Հայաստանը ներդնելու է առավելագույն ջանքերը՝ աջակցելու և ներդրում ունենալու UNDP/UNFPA/UNOPS Գործադիր խորհրդի աշխատանքներին՝ ի շահ ծրագրային երկրներում 2030 Օրակարգի իրականացման, սոցիալական, տնտեսական և շրջակա միջավայրի պահպանության ոլորտներում ներառական, արդյունավետ և կայուն զարգացման ապահովման համար»,- ասված է հաղորդագրությունում։

UNDP, UNFPA և UNOPS-ի Գործադիր խորհուրդը պատասխանատու է տվյալ կազմակերպությունների գործունեության վերահսկման և աջակցության համար։ Այն բաղկացած է 36 անդամ պետություններից և ապահովում է վերոնշհալ գործակալությունների կողմից ծրագրային երկրներում պատշաճ աշխատանքների իրականացումը՝ տրամադրելով ռազմավարական ուղղորդում և իրականացնելով մշտադիտարկում։