Հայաստանի հակակոռուպցիոն դատարանը թույալտրել է ՊԵԿ նախկին նախագահ, Ֆինանսների նախկին նախարար Գագիկ Խաչատրյանի մեկնել Գերմանիա բուժման նպատակով։ Այդ մասին ֆեյսբուքյան իր էջում հայտնել է նրա փաստաբան Երեմ Սարգսյանը։

Սակայն ընդամենը ժամեր անց դատախազը որոշում է կայացրել Խաչատրյանի նկատմամբ մոտ 5-6 տարի առաջ հարուցված և այդքան ժամանակ քննված քրգործով հանրային քրեական հետապնդում հարուցել և որպես խափանման միջոց կիրառել բացակայելու արգելքը։

«Ապրիլի 3-ին կայացած հերթական նիստում, որը նախագահել է դատավոր Գիվի Հովհաննիսյանը, ՀՀ հակակոռուպցիոն դատարանը բավարարել է Խաչատրյանի պաշտպանական թիմի ներկայացրած միջնորդությունը՝ նրան թույլատրելով երկու ամսով մեկնել Գերմանիա՝ բժշկական միջամտության և վերադարձի նպատակով։

Նշվել է, որ դեռևս 2019 թվականից դատախազությունն ու քննչական մարմինները հետևողականորեն փորձել են խոչընդոտել Խաչատրյանի արտասահման մեկնելը՝ վիրահատության ենթարկվելու համար։ Այդ անգործության հետևանքով, փաստաբանի խոսքով, Խաչատրյանը դարձել է հաշմանդամ, ինչը հաստատվել է իրավասու մարմնի որոշմամբ։

Դատարանը՝ ուսումնասիրելով ներկայացված բժշկական փաստաթղթերը, արձանագրել է, որ Գագիկ Խաչատրյանի երկրից ելքը արգելելը և վիրահատությունից զրկելը կարող են բերել անդառնալի հետևանքների, և ի վերջո կայացրել է միակ համարժեք և արդար որոշումը՝ թույլատրելով Գերմանիա մեկնելը։

Որոշման մեջ ամրագրված է, որ Գագիկ Խաչատրյանի մեկնումը պետք է սկսվեր ապրիլի 5-ից, ուստի դատարանը հանձնարարել է ՀՀ ոստիկանությանը՝ վերացնել մինչ այդ կիրառված ելքի արգելքը։

Սակայն պարզվում է, որ ՀՀ գլխավոր դատախազությունը և քննչական մարմինը շարունակում են իրենց ակնհայտ ապօրինի վարքագիծը և չեն կարողանում «մարսել» Հայաստանի Հանրապետության դատարանի օրինական ուժի մեջ գտնվող որոշումը, ուստի այդ որոշումից ընդամենը ժամեր անց՝ 2025 թվականի ապրիլի 4-ին՝ ժամը 12։20-ին, դատախազը որոշում է կայացրել Գագիկ Խաչատրյանի նկատմամբ շուրջ 5-6 տարի առաջ հարուցված և այդքան ժամանակ քննված քրեական գործով հանրային քրեական հետապնդում հարուցելու մասին, որից անմիջապես հետո այդ գործով նրա նկատմամբ որպես խափանման միջոց է կիրառվել բացակայելու արգելքը և ՀՀ ոստիկանությոնը կրկին հանձնարարվել է արգելել ՀՀ-ից Գագիկ Խաչատրյանի մեկնումը Գերմանիա»,–ասվում է գրառման մեջ։

Փաստաբանի պնդմամբ՝ սա հերթական ապօրինի քայլն է, որի նպատակն է խոչընդոտել Խաչատրյանի բուժումը։ Նա ընդգծել է, որ այդ գործով ներկայացված ապացույցներն իրավապահներին հայտնի են եղել տարիներ շարունակ, սակայն մինչ այս դատարանի որոշումը դրանք համարվել են անբավարար մեղադրանք առաջադրելու համար, իսկ այժմ հանկարծակի դարձել են բավարար։

Նշվել է նաև, որ այս գործով Եվրոպական դատարանում արդեն ընթացքի մեջ է գանգատ՝ հիմնված կոնվենցիայի 2-րդ (կյանքի իրավունք) և 3-րդ (խոշտանգման արգելք) հոդվածների խախտումների վրա։ Ըստ փաստաբանի՝ Եվրոպական դատարանը խիստ հարցադրումներ է հղել ՀՀ կառավարությանը, սակայն նույնիսկ դա չի ստիպել իրավապահներին դադարեցնել ենթադրյալ ապօրինությունները։

Փաստաբանը հայտարարել է, որ դատապարտում են դատախազության և քննչական մարմնի նման գործելակերպը և վստահ են, որ ի վերջո այս գործողությունները կդառնան դատական գնահատականի արժանացած՝ այդ թվում Մարդու իրավունքների եվրոպական դատարանի որոշումներում։