Աշխատանքային այցով Գեղարքունիքի մարզ այցելած Մարդու իրավունքների պաշտպան Անահիտ Մանասյանն ասել է, որ պետք է երիտասարդների իրավունքների իրացումն ապահովել ոչ միայն Երևանում, այլ նաև մարզերում։

Պաշտպանի նախաձեռնությամբ Մարտունի խոշորացված համայնքի երիտասարդների ներգրավմամբ կազմակերպվել էր միջոցառում, որին մասնակցել են Մարտունու տարածաշրջանային և բժշկական պետական քոլեջների ուսանողները, ինչպես նաև տարբեր դպրոցներից աշակերտներ։

Միջոցառման ընթացքում բարձրացվել են մարդու իրավունքների վերաբերյալ մի շարք առանցքային թեմաներ։ Պանելային ձևաչափով քննարկումները վարել են ուսանողներն իրենք՝ ուղղելով հարցեր ինչպես Մարդու իրավունքների պաշտպանին, այնպես էլ ՀՀ ԱԺ մարդու իրավունքների պաշտպանության և հանրային հարցերի մշտական հանձնաժողովի նախագահ, Ազգային ժողովում եզդիական համայնքը ներկայացնող պատգամավոր Ռուստամ Բաքոյանին, կրթության, գիտության, մշակույթի և սպորտի նախարարության, ՄԻՊ աշխատակազմի ներկայացուցիչներին ու երեխաների իրավունքների պաշտպանության հարցերով հասարակական խորհրդի աշխատանքային խմբի անդամներին։

Հանդիպմանը ներկա է եղել նաև Մարտունի համայնքի ղեկավար Հովհաննես Հովեյանը։

Իր ելույթում Անահիտ Մանասյանը հիշեցրել է, որ դեռևս 2024 թվականի նոյեմբերին Մարտունիում քաղաքացիների հետ հանդիպման ժամանակ երիտասարդները բարձրաձայնել են մարզում իրենց իրավունքների իրացման սահմանափակումների մասին՝ հատկապես՝ լսելի լինելու և ծրագրերին մասնակցության տեսանկյունից։

«Այդ ժամանակ խոստացել էի իմ լիազորությունների շրջանակում աջակցել երիտասարդներին, եթե նրանք ներկայացնեն լավ գաղափարներ և ցուցաբերեն նախաձեռնողականություն: Եվ , ահա, այսօր մենք հենց այդ նախաձեռնությունների հիմնական արդյունքն ունենք։ Այս միջոցառման շրջանակներում առանցքային դերակատար են ոչ միայն պետական մարմինների ներկայացուցիչները, այլ նաև իրենք` երիտասարդները: Երիտասարդների իրավունքների իրացումը, այդ թվում՝ մասնակցության, պետք է կարողանանք ապահովել ոչ միայն Երևանում, այլև ողջ հանրապետության տարածքում՝ մարզային լայն սփռմամբ՝ ներգրավելով բոլոր հնարավոր բնակավայրերը»,- ասել է Պաշտպանը:

Քննարկումների ընթացքում ուսանողներն ու աշակերտները բարձրացրել են կրթության իրավունքի ապահովման, խտրականության արգելքի, կանանց և տղամարդկանց իրավահավասարության, ազգային փոքրամասնությունների իրավունքների պաշտպանման, մասնագիտությունների գրավչության բարձրացման ու հասանելիության, ուսման և աշխատանքի համատեղելիության խնդիրներ։

Ամփոփելով իր խոսքը՝ Պաշտպանը հույս է հայտնել, որ նման համագործակցությունների միջոցով հնարավոր կլինի կյանքի կոչել առավել արդյունավետ ծրագրեր։

«Սիրելի երիտասարդներ, շարունակեք նախաձեռնողականություն ցուցաբերել տարբեր ծրագրերի իրականացման համար,մենք մեր լիազությունների սահմաններում միայն կաջակցենք ձեր գաղափարների կյանքի կոչմանը», – եզրափակել է Անահիտ Մանասյանը։