Սրբազան շարժման առաջնորդ Բագրատ արքեպիսկոպոս Գալստանյանը, անդրադառնալով Գյումրիում և Փարաքարում կայացած ՏԻՄ ընտրություններին, շնորհավորել է այդ համայնքներում «հայրենիք ունեցող մարդկանց՝ հաղթանակի առիթով»։

«Ուզում եմ շնորհավորել Գյումրիում, Փարաքարում, մեր համայնքներում հայրենիք ունեցող մարդկանց՝ հաղթանակի առիթով…Դժվարություններ կային հատկապես Գյումրիում, որոնք այս պահին գոնե հաղթահարվել են, և հուսով եմ, որ այդպես էլ կշարունակվի՝ ճիշտ ճանապարհով ընթանալով այն սկզբունքով, ինչ մեր տերն ասում է՝ ուրացիր քո անձը, բան չես շահելու… Աշխարհն էլ շահես, անձդ կորցնես, ինչ օգուտ ունի… Բոլոր տեսակի հաշիվները՝ մեծ ու փոքր, իրավացի կամ ոչ, ավելին չեն, քան մեր կյանքը, մեր գիտակցությունը, մեր հայրենիքը, մեր պետությունը և մեր Աստված», հայտնում է «Առավոտը»։

«Չկա մարդ, որ ցանկանում է պարտություն ունենալ, բացի այս չարիքից, որը գովերգում է պարտությունը, այն պարտությունը համարում է բոլորինը, վերագրում է բոլորիս եւ իր պարտությունը փորձում է տարածելով մեզ վրա՝ ներկայացնել որպես հաղթանակ, ինքնիշխանություն, ձեռքբերում, անկախության նվաճում…»,- ասել է սրբազանը՝ նկատի ունենալով վարչապետ Նիկոլ Փաշինյանին:

ԿԸՀ-ն ամփոփել է մարտի 30–ին կայացած ՏԻՄ արտահերթ ընտրությունների նախնական արդյունքները, որոնց համաձայն Գյումրիում ոչ մի ուժի չի ստացել մեծամասնության քվեն։ Համայնքի ղեկավար ընտրելու համար քաղաքական կոալիցիաներ կազմելու անհրաժեշտություն կառաջանա։Եթե ընդդիմադիր ուժերը միավորվեն, Գյումրին կունենա ընդդիմադիր քաղաքապետ։

Փարաքարում ընտրություններին մասնակցել է 4 քաղաքական ուժ՝ «Քաղաքացիական պայմանագիր» (Լյուդվիգ Գյուլնազարյան), «Միասնություն» դաշինք (Վալոդյա Գրիգորյան), «Ազգային առաջընթաց» կուսակցություն (Դավիթ Մինասյան) և «Կայունություն» կուսակցություն (Գոռ Սարիբեկյան)։ Առաջատարը «Միասնություն» դածինքն է, որի մաս կազմող «Ապրելու երկիր» կուսակցությունը հայտնել է իր թեկնածուի՝ Վալոդյա Գրիգորյանի հաղթանակի մասին։