Պռոշյանի և Քասախի բնակիչները, ովքեր վաղ առավոտից փակել էին Երևան-Աշտարակ մայրուղին, երկարատև բանակցություններից հետո համաձայնվել են ճանապարհը բացել։

Նրանք բողոքել են երթուղային տրանսպորտի համակարգի փոփոխություններից։ Հատկապես դժգոհություն է առաջացրել թիվ 25 և 59 երթուղիների դադարեցումը և դրանց փոխարեն նոր, թանկարժեք երթուղու սահմանումը։ Նոր երթուղին սպասարկող «Մուլտիտրանսպորտ» ընկերությունը սահմանել է ուղեվարձերը՝ համապատասխանաբար 250 և 200 դրամ, հայտնում է Aysor.am-ը։

Բողոքողներին խոստացել են, որ մինչև խնդրի վերջնական կարգավորումը՝ 25 համարը կշարունակի աշխատել։

«Եթե երկուշաբթի մեր հարցին դրական լուծում չտվեցին, մեր պահանջը չիրկանացրեցին, 25 համարը չպահպանվեց, պալատկեքը խփելու ենք Նիկոլի տան առաջ, ավելի փիս ակցիաներ ենք անելու»,- հայտարարել է քաղաքացիներից մեկը։

Նրանց հետ հանդիպել են ՀՀ ներքին գործերի նախարարության ոստիկանության Պարեկային ծառայության Կոտայքի մարզի գումարտակի պարեկները՝ գումարտակի հրամանատար Լևոն Բադալյանի գլխավորությամբ:

Ըստ բնակիչների ներկայացրած տվյալների՝ երթուղու երկարությունը 15 կմ է, տևողությունը 20 րոպե, ուղեվարձը՝ 250 դրամ, տրանսպորտային միջոցների քանակը՝ 6, աշխատանքային ժամերը՝ առավոտյան ժամը 07:00-ից մինչև 19:00-ն: Այդ չակերտավոր բարեփոխումը մի շարք խնդիրներ է ստեղծելու Պռոշյան և Քասախ գյուղերի բնակիչների համար, հայտնում է Panorama.am-ը։

Հայտնի է դարձել, որ ապրիլի 7-ին Պռոշյանի բնակիչները հանդիպում են ունենալու տարածքային կառավարման և ենթակառուցվածքների փոխնախարար Արմեն Սիմոնյանի հետ։