Ապրիլի 4-ին ԱԳՆ գլխավոր քարտուղար Դավիթ Կարապետյանը մասնակցել է Չեխիայում ՀՀ դեսպանատան կազմակերպած հանդիպմանը և ներկայացրել«Խաղաղության խաչմերուկ» նախաձեռնությունը։

Հանդիպմանը մասնակցել են քաղաքագիտության, վերլուծության և հետազոտությունների ոլորտում մասնագիտացած չեխական տարբեր կենտրոնների փորձագետներ։

Գլխավոր քարտուղարը նրանց հետ վարած քննարկման ընթացքում անդրադարձ է կատարել տարածաշրջանում խաղաղության հաստատման ուղղությամբ Հայաստանի ձեռնարկած քայլերին։

Կառավարությունը մշակել և ներկայացրել է «Խաղաղության խաչմերուկ» նախագիծը, որի առանցքում Հայաստանի, Թուրքիայի, Ադրբեջանի, Իրանի միջև կոմունիկացիաների զարգացումն է՝ ճանապարհներ, երկաթուղիներ, խողովակաշարեր, մալուխներ, էլեկտրահաղորդման գծեր նորոգելու, կառուցելու, գործարկելու միջոցով: Բոլոր ենթակառուցվածքները, ներառյալ ճանապարհները, երկաթուղիները, օդային ուղիները, խողովակաշարերը, մալուխները և էլեկտրահաղորդման գծերը գործելու են այն երկրների ինքնիշխանության և իրավազորության ներքո, որոնցով անցնում են։