«Փաստերի ստուգման հարթակ» (FIP) դիտարկել է Հայաստանի և ԱՄՆ միջև առևտրային հարաբերությունները՝ ԱՄՆ նախագահի նոր մաքսատուրքերի սահմանման համատեքստում։

ԱՄՆ նախագահ Դոնալդ Թրամփը ապրիլի 2-ին ներկայացրել է նոր մաքսային քաղաքականությունը, որի համաձայն՝ մի շարք երկրների, այդ թվում ՀՀ համար, սահմանվել են 10% բազային մաքսատուրքեր՝ ներկրվող բոլոր ապրանքների վրա։

«Փաստերի ստուգման հարթակն» ուսումնասիրել է Հայաստանի և Միացյալ Նահանգների առևտրաշրջանառությունը և թե ինչ ապրանքներ է ՀՀ-ն արտահանում ԱՄՆ:

ԱՄՆ առևտրի ներկայացուցիչների գրասենյակի տվյալներով՝ 2024 թվականին Հայաստանի և ԱՄՆ-ի միջև ընդհանուր ապրանքային առևտրի ծավալը գնահատվել է 282.4 միլիոն դոլար։ ԱՄՆ-ի ապրանքային արտահանումը Հայաստան 2024-ին կազմել է 160.8 միլիոն դոլար, ինչը 14.8%-ով (27.9 միլիոն դոլարով) պակաս է 2023-ի ցուցանիշից։

ԱՄՆ-ի ապրանքային ներմուծումը Հայաստանից նույն տարում կազմել է 121.6 միլիոն դոլար, որը 8.4%-ով (11.1 միլիոն դոլարով) նվազել է 2023-ի համեմատ։ ԱՄՆ-ի ապրանքային առևտրային ավելցուկը Հայաստանի հետ կազմել է 39.2 միլիոն դոլար, ինչը 2023-ի համեմատ 29.9%-ով (16.7 միլիոն դոլարով) կրճատվել է։

Ըստ ՀՀ վիճակագրական կոմիտեի տվյալների՝ 2024 թվականին Հայաստանը ԱՄՆ արտահանել է 59 մլն դոլարի ապրանք: Ըստ պետական եկամուտների կոմիտեի 2024 թ․ առաջին կիսամյակի տվյալների, Հայաստանից ԱՄՆ արտահանումը կազմել է 28․2 մլն ԱՄՆ դոլար։

Թրամփն իր ելույթի ընթացքում ներկայացրել էր աղյուսակ, ըստ որի Եվրամիության ապրանքների վրա սահմանվել է 20%, Չինաստանի՝ 34%, Մեծ Բրիտանիայի՝ 10%, իսկ Հայաստանի դեպքում՝ 10% մաքսատուրք։ Ցանկում բացակայում են Մեքսիկան, Կանադան, ինչպես նաև Ռուսաստանը, Բելառուսը և Իրանը։

Նոր բազային մաքսատուրքերը ուժի մեջ կմտնեն ապրիլի 5-ից, իսկ «փոխադարձ» մաքսատուրքերը՝ ապրիլի 9-ից։

Սահմանված մաքսատուրքերը չեն ներառի նավթի, գազի և վերամշակված արտադրանքի ներմուծումը։

Դեռևս իր 2024 թվականի նախընտրական արշավի ժամանակ Թրամփը խոստացել էր սահմանել բարձր մաքսատուրքեր՝ մասնավորապես Չինաստանից ներմուծվող ապրանքների ուղղությամբ։