Աշխարհի 500 ամենահարուստ մարդիկ մեկ օրում մոտ 208 միլիարդ դոլար են կորցրել՝ ԱՄՆ նախագահ Դոնալդ Թրամփի կողմից մաքսատուրքերի սահմանումից հետո, ինչը գլոբալ շուկաների անկման պատճառ է դարձել: Այս անկումը Bloomberg–ի Միլիարդատերերի ցուցանիշի 13-ամյա պատմության մեջ չորրորդ ամենամեծն է և ամենախոշորը՝ սկսած COVID-19 համավարակի գագաթնակետից, գրում է The Economic Times-ը։

Bloomberg Billionaires Index–ում ընդգրկվածների ավելի քան կեսը տեսել են իրենց կարողությունների նվազում՝ միջինում 3.3%-ով: ԱՄՆ-ի միլիարդատերերը ամենաշատն են տուժել, հատկապես Մարկ Ցուկերբերգը և Ջեֆ Բեզոսը:

Meta-ի համահիմնադիր Մարկ Ցուկերբերգն ունեցել է ամենամեծ ֆինանսական կորուստը, քանի որ սոցիալական մեդիայի ընկերության 9%-անոց անկումը նրա հարստություը նվազեցրել է 17.9 միլիարդ դոլարով: Հունվարի սկզբից մինչև փետրվարի կեսերը Meta-ն եղել է բարձր արդյունքներ ցուցաբերողներից մեկը «հրաշալի յոթյակում», որի կապիտալիզացիան աճել է ավելի քան 350 միլիարդ դոլար, սակայն փետրվարի կեսերից սկսած ընկերության բաժնետոմսերն ընկել են մոտ 28%-ով:

Amazon-ի բաժնետոմսերը նվազել են 9%-ով՝ ապրիլի 2022-ից ի վեր ամենախոշոր օրական անկումը, ինչը Բեզոսի անձնական հարստությունը նվազեցրել 15.9 միլիարդ դոլարով: Ընկերության բաժնետոմսերն այժմ ավելի քան 25%-ով ցածր են փետրվարյան գագաթնակետից:

Tesla-ի գլխավոր տնօրեն Իլոն Մասկն այս տարի կորցրել է 110 միլիարդ դոլար, այդ թվում՝ 11 միլիարդը միայն ապրիլի 3–ին: Ընկերության բաժնետոմսերն անկում են ապրել թույլ մատակարարումների և Թրամփի կողմից Մասկին պետկառավարման համակարգում նշանակելու վեճերի պատճառով: Շաբաթվա սկզբին ընկերության բաժնետոմսերն աճել էին՝ հույսերով, որ Tesla-ի ԱՄՆ-ում իրականացվող արտադրությունը կփրկի այն սակագրերից, ինչպես նաև, որ Մասքը հնարավոր է՝ հեռանա պետական աշխատանքից ու վերադառնա ընկերությանը: Բայց հինգշաբթի օրը բաժնետոմսերն ընկել են ևս 5.5%-ով:

ԱՄՆ նախագահ Դոնալդ Թրամփը ապրիլի 2-ին ներկայացրել է նոր մաքսային քաղաքականությունը, որի համաձայն՝ մի շարք երկրների, այդ թվում ՀՀ համար, սահմանվել են 10% բազային մաքսատուրքեր՝ ներկրվող բոլոր ապրանքների վրա։

Ցանկում բացակայում են Մեքսիկան, Կանադան, ինչպես նաև Ռուսաստանը, Բելառուսը և Իրանը։ Նոր բազային մաքսատուրքերը ուժի մեջ կմտնեն ապրիլի 5-ից, իսկ «փոխադարձ» մաքսատուրքերը՝ ապրիլի 9-ից։ Սահմանված մաքսատուրքերը չեն ներառի նավթի, գազի և վերամշակված արտադրանքի ներմուծումը։