Հայաստանում շարժական լայնաշերտ կապի 5G տեխնոլոգիայի ծածկույթի ընդլայնման ուղղությամբ հերթական նշանակալի քայլն է իրականացվել։ ՀՀ Հանրային ծառայությունները կարգավորող հանձնաժողովը «Վիվա Արմենիա» ընկերությանը 10 տարով տրամադրել է 2300-2350 ՄՀց և 2350-2400 ՄՀց ռադիոհաճախականությունների շերտեր՝ նպաստելու շարժական լայնաշերտ կապի 5G տեխնոլոգիայի առավել լայն տարածմանը։ Ընկերությունը պետական բյուջե է փոխանցել 2.5 միլիարդ ՀՀ դրամ։ Այդ մասին ֆեյսբուքյան իր էջում հայտնել է բարձր տեխնոլոգիական արդյունաբերության նախարար Մխիթար Հայրապետյանը։

«Վիվա Արմենիա» ընկերությունը ստանձնել է հետևյալ պարտավորությունները՝ 3 տարում՝ մայրուղիների 98 տոկոսը ծածկել շարժական ինտերնետով, դրանցից առնվազն 10 տոկոսը՝ 5G տեխնոլոգիայով, յուրաքանչյուր նոր մայրուղի՝ շահագործումից հետո 3 տարում՝ 98 տոկոսը շարժական ինտերնետով, 10 տոկոսը՝ 5G-ով:

3 տարում՝ Երևան, Գյումրի, Վանաձոր, Կապան քաղաքների տարածքի 20 տոկոսը՝ 5G-ով, Ինժեներական քաղաք, Զվարթնոց, Գյումրու, Կապանի օդանավակայանները և բոլոր սահմանային գործող և նոր մաքսակետերը ծածկել լիարժեք 5G ծածկույթով: Ինչպես նաև 5 տարում՝ վերոնշյալ 4 քաղաքների 40 տոկոսը՝ 5G ծածկույթով, իսկ Ակադեմիական քաղաքի ամբողջ տարածքը՝ 5G-ով: 7 տարում՝Հայաստանի յուրաքանչյուր քաղաքային բնակավայրի 60 տոկոսը ապահովել՝ 5G տեխնոլոգիայով»,- գրել է նախարարը:

Հայրապետյանն ընդգծել է, որ այս քայլով մեկնարկում է Հայաստանի թվային առաջընթացի նոր շրջանը։