Ֆանարջյանի անվան Ուռուցքաբանության ազգային կենտրոնի և Գերմանիայի Հայդելբերգի համալսարանական կլինիկայի միջև ստորագրվել է փոխըմբռնման հուշագիր։ Առողջապահության նախարարի առաջին տեղակալ Լենա Նանուշյանի գլխավորությամբ պատվիրակությունը Գերմանիայում է։
Պատվիրակության անդամները այցելել են Հայդելբերգի համալսարանական կլինիկա, որտեղ հանդիպել են հիվանդանոցի հոգաբարձուների խորհրդի նախագահ Յուրգեն Դեբուսի հետ, ով նաև գլխավորում է ճառագայթային ուռուցքաբանության և ճառագայթային թերապիայի բաժանմունքը։
Հանդիպման ընթացքում Լենա Նանուշյանն շեշտել է, որ առողջապահական նորարարական լուծումների և ժամանակակից տեխնոլոգիաների ներդրման միջոցով հնարավոր է ընդլայնել ու խթանել առողջապահական համագործակցությունը երկու երկրների միջև։
Վ.Ա. Ֆանարջյանի անվան Ուռուցքաբանության ազգային կենտրոնի և Հայդելբերգի համալսարանական կլինիկայի մասնագետները մասնակցել են փորձի փոխանակման և համագործակցության հնարավորությունների շուրջ քննարկմանը։ Կողմերն անդրադարձել են նորագույն մեթոդներով օնկոլոգիական հիվանդությունների բուժմանը և իրենց երկրների առողջապահական համակարգերում մատուցվող ծառայություններին։
Այնուհետև պատվիրակությունը շրջայց է կատարել կլինիկայի տարբեր բաժանմունքներով։
Ստորագրված հուշագրով նախատեսվում են համագործակցության մի շարք ուղղություններ՝ այդ թվում համատեղ գիտական ուսումնասիրությունների իրականացում, կլինիկական դիտորդական ծրագրերի մշակում ու կիրառում, վերապատրաստումներ, մասնագիտական համաժողովների անցկացում, ինչպես նաև փորձի փոխանակում մասնագետների միջև։
