Մաքսային մարմինների գործողությունների արդյունքում բացահայտվել է Իրանի քաղաքացիների կողմից Հայաստան մոտ 12 կգ թմրամիջոց ներկրելու դեպքը։ Կան կալանավորվածներ։

Օրերս «Ագարակ» սահմանային անցակետում, Պետական սահմանի ցամաքային հատվածում մաքսային ծառայությունների աշխատակիցը ռենտգեն սարքի միջոցով ստուգել է Իրանից ժամանած Ն․Ա․-ի վարած բեռնատարը և կցորդը։ Ստուգման արդյունքում կցորդին ամրացված ջրատարում հայտնաբերվել են կասկածելի նյութեր՝ հաղորդել են ՊԵԿ-ից։

ՊԵԿ մաքսանենգության դեմ պայքարի վարչության օպերատիվ հետախուզության բաժնի և պետական սահմանի ցամաքային հատվածում մաքսային ծառայությունների աշխատակիցները համատեղ, հայտնաբերել են կցորդին ամրացված ջրատարից վերցված փայլաթիթեղով փաթեթավորված, ընդհանուր 11,962 գրամ քաշով 15 փաթեթ՝ որոնք պարունակել են մեթամֆետամին տեսակի թմրամիջոցի նմանվող սպիտակ բյուրեղանման զանգված։

Հենվելով թմրամիջոցների մաքսանենգության անմիջական կասկածի վրա՝ Իրանի քաղաքացի Ն․Ա․-ն ձերբակալվել է և փոխանցվել է Քննչական կոմիտեի Սյունիքի մարզային ստորաբաժանում։ Քրեական վարույթի շրջանակում Ն․Ա․-ն կալանավորվել է, իսկ գործը հանձնվել է ՀՀ ՔԿ հատկապես կարևոր գործերի քննության գլխավոր վարչությանը, որը մասնագիտացած է թմրանյութերի, թրաֆիքինգի և անչափահասների դեմ ուղղված հանցագործությունների քննության մեջ։

ՊԵԿ մաքսանենգության դեմ պայքարի վարչության, ԱԱԾ տնտեսական անվտանգության և կոռուպցիայի կանխման գլխավոր վարչության, ինչպես նաև Քննչական կոմիտեի համապատասխան բաժնի աշխատակիցների իրականացրած համատեղ օպերատիվ միջոցառումներով պարզվել է, որ նշված թմրամիջոցը պետք է փոխանցվեր Է․Ն․ անունով մեկ այլ իրանցի քաղաքացու։

Գործողությունների ընթացքում մեթամֆետամինը փոխարինվել է նման տեսք ունեցող զանգվածով և մշակվել է հատուկ քիմիական նյութով։ Հայտնաբերվել է նաև թմրամիջոցի ստացողի ինքնությունը։ Է․Ն․-ի մուտքից հետո նրա հանդեպ սահմանվել է վերահսկում։

Նա ժամանել է «Զվարթնոց» օդանավակայան և ուղևորվել է հանդիպման Ն․Ա․-ի հետ։ Երևանյան հյուրանոցներից մեկում, օպերատիվ աշխատակիցների հսկողության ներքո, նրան են հանձնվել փոխարինված փաթեթները։ Է․Ն․-ն ձերբակալվել է ՊԵԿ և ԱԱԾ ծառայողների կողմից՝ թմրամիջոց ձեռք բերելու, մաքսանենգ ճանապարհով Հայաստան մուտք բերելու և իրացնելու նպատակով գործողություններ կատարելու կասկածանքով։

Քրեական վարույթի շրջանակում դատարան է ներկայացվել երկու քաղաքացիներին կալանավորելու միջնորդություն, որը բավարարվել է։