«Նեմրա» (NEMRA) ռոք խումբը, որն ավելի քան տասը տարի ստեղծագործում է և հանդիսատեսին ներկայացնում հեղինակային, երաժշտական նոր մոտեցումներով հայկական ժողովրդական և այլ երգեր, հունիսի 11-ին Կարեն Դեմիրճյանի անվան մարզահամերգային համալիրում հանդես կգա մեծ մենահամերգով և երկրպագուներին կներկայացնի The End of the Party ալբոմը։

Խմբի կազմում ընդգրկված են Վան Եղիազարյանը, Մարիաննա Կարակեյանը (բեք-վոկալ, ստեղնաշարային գործիքներ), Վասպուր Եղիազարյանը (բեք-վոկալ, բաս կիթառ) և Մարեկ Զաբորսկին (հարվածային գործիքներ)։

Վան Եղիազարյանը նշել է, որ խմբի ներկա կազմը երբևէ եղածից առավել ներդաշնակ է։

«Մեր համերգների ժամանակ դա նկատվում է։ Թե՛ բնավորությամբ, թե՛ կերպարներով շատ տարբեր ենք, բայց բեմում ասես մեկ մարդ ենք դառնում։ Երաժշտություն ստեղծելիս տարբեր գույները միաձուլվում են, ինչի արդյունքում հետաքրքիր կտավ է ստացվում»,-ասել է նա՝ անդրադառնալով The End of the Party ալբոմին, որը «Նեմրա»-ի երրորդ ձայնասկավառակն է։

Եղիազարյանը նաև հավելել է, որ ալբոմում ընդգրկված երգերի մեծ մասը գրվել է իր կողմից, սակայն խմբի յուրաքանչյուր անդամ իր ստեղծագործական ներդրումն է ունեցել, ինչը երաժշտությանը հաղորդել է ուրույն հնչողություն և դրական մթնոլորտ։ Ալբոմում տեղ են գտել նաև Վասպուր Եղիազարյանի հեղինակած երկու երգերը։ Ինչպես նախորդ ստեղծագործությունները՝ Mubla և Hmm, այնպես էլ նոր ալբոմի երգերը ներկայացված են անգլերենով։

Թեպետ խումբը սովորաբար հանդես է եկել բացօթյա բեմահարթակներում, այս անգամ նրանք սպասում են համերգին փակ տարածքում՝ վստահ լինելով, որ մարզահամերգային համալիրի ձայնային և լույսային լուծումները յուրահատուկ փորձառություն կապահովեն հանդիսատեսի համար։ Համերգն անցկացվելու է երկու հատվածով՝ սկզբում կներկայացվեն նոր ալբոմի երգերը, ապա կհնչեն հանդիսատեսի կողմից սիրված հիթերը։

«Նեմրա»-ի երաժշտական ուղին վաղուց արդեն անցել է Հայաստանի սահմաններից։ Վերջին ամիսներին խումբը ելույթներ է ունեցել ԱՄՆ-ում՝ հանդես գալով Գլենդելի «Ալեքս» թատրոնի լեփ-լեցուն դահլիճում։ Վանը նշել է, որ այդ զգացողությունները բառերով փոխանցելն անհնար է։ Նրանք համերգներով ելույթ են ունեցել նաև Սիեթլ քաղաքում։ ԱՄՆ շրջագայությունից հետո խումբը վերադարձել է Հայաստան՝ մի շարք համերգներ ունենալով, իսկ այնուհետև մեկնել է Կանադա՝ ելույթ ունենալով Մոնրեալում և Տորոնտոյում։