ԴՕԿ կուսակցությունը հայտնել է, որ Վարդան Ղուկասյանը չի արտահանձնվի Հայաստան՝ նշելով, որ սա իրենց պայքարի կարևոր հաղթանակներից մեկն է։

«Մենք արդեն հայտարարել էինք մեր հաղթանակի մասին։ Շնորհավորել էինք բոլորին։ Բայց դեռ լռում էինք՝ չհայտարարելով պատճառը։ Շատերն անհամբեր էին, շատերն ուզում էին իմանալ՝ ինչի՞ մասին է խոսքը։ Մենք սպասում էինք մեկ մարդու խոսքին։ Եվ ահա այսօր հենց Վարդան Ղուկասյանը ինքն հաստատեց՝ նա չի արտահանձնվելու Հայաստան։

Սա մեր պայքարի մեծ հաղթանակներից մեկն է։ Սա արդարության հաղթանակն է՝ սկզբունքայնության, լռության և հավատքի միջոցով կերտված։ Մենք երբեք չենք շտապել։ Մենք չենք խոսել մինչ այդ պահը, երբ ամեն ինչ պետք է լսվեր հենց նրանից՝ ով եղել է այս պայքարի կենտրոնում։ Նրա լռությունը մեզ համար խոսք էր, իսկ այսօր այդ լռությունը վերածվեց հստակության։

Ցանկացած ճշմարիտ շարժում ունի իր ներքին ռիթմը։ Եվ մենք երբեք չենք շեղվել այդ ռիթմից։ Մեզ համար միշտ կարևորը եղել է ոչ թե առաջինը խոսել, այլ ճիշտ պահին ասել ճիշտ բանը։

Այսօր կարող ենք ամբողջ սրտով կրկնել՝ այո՛, սա հաղթանակ է։ Բայց սա նաև հիշեցում է՝ պայքարը շարունակվում է։ Դատական գործընթացները դեռ ընթացքի մեջ են, և մենք սպասում ենք լիարժեք ազատության»,–ասվում է հայտարարության մեջ։

Քննչական կոմիտեն դեռ 2023 թվականին տեղեկացրել է, որ Վարդան Ղուկասյանը, գտնվելով ԱՄՆ-ում, ենթարկվում է հանրային քրեական հետապնդման։ Նրա նկատմամբ ընտրվել է կալանավորումը որպես խափանման միջոց, և հայտարարվել է հետախուզում։ Քրեական գործով առկա են շորթման դրվագներ։ Բացի այդ, Վարդան Ղուկասյանը հետապնդվում է նաև արդեն նախկին դատավոր Արշակ Վարդանյանին զրպարտելու և արդարադատության իրականացմանը խոչընդոտելու մեղադրանքներով։