Հայաստանի քաղաքացիները ներկայումս հնարավորություն են ստացել հատել Ռուսաստանի և Բելառուսի միջև սահմանը նաև ցամաքային տրանսպորտի միջոցով։ Այս փոփոխությունը հետևել է ԵԱՏՄ տարածքում քաղաքացիների ազատ տեղաշարժման խոչընդոտներից մեկի վերացմանը, ինչի մասին հայտարարել է Եվրասիական տնտեսական հանձնաժողովը։
Հանձնաժողովից հիշեցրել են, որ վերջերս ուժի մեջ է մտել երկու երկրների՝ Ռուսաստանի և Բելառուսի միջև վիզաների փոխադարձ ճանաչման համաձայնագիրը, ինչը նպաստել է այս որոշման իրականացմանը, հայտնում է 1lurer.am-ը։
«Ռուսաստանի Դաշնությունը և Բելառուսի Հանրապետությունը Եվրասիական տնտեսական հանձնաժողովին տեղեկացրել են, որ Հայաստանի, Ղազախստանի և Ղրղզստանի քաղաքացիները ներկայումս գործնական հնարավորություն ունեն Բելառուսից Ռուսաստան և Ռուսաստանից Բելառուս անցնելու միջազգային երկաթուղային և օդային հաղորդակցության օգտագործվող ուղիներով, ինչպես նաև համաձայնագրի հավելվածում թվարկված ավտոմոբիլային հաղորդակցության ուղիներով»,- հայտնել են հանձնաժողովից։
Մինչ այդ Հայաստանի, Ղազախստանի և Ղրղզստանի քաղաքացիները Ռուսաստանի և Բելառուսի միջև սահմանը կարող էին հատել միայն ինքնաթիռով, այժմ քաղաքացիները կարող են երթևեկել նաև ցամաքային տրանսպորտով։ Դրա համար մուտքի արտոնագիր չի պահանջվում։
