Մեծի Տանն Կիլիկիո կաթողիկոս Արամ Առաջինը Վատիկանի Պետական քարտուղարին հղած նամակում իր խորին ցավակցությունն է հայտնել Ֆրանցիսկոս պապի մահվան կապակցությամբ։
Նա նշել է, որ կաթոլիկ եկեղեցու ղեկավարը համարձակ քայլերով առաջնորդել է վերափոխման գործընթաց՝ բացելով նոր փուլ ինչպես եկեղեցական մտածողության, այնպես էլ ամբողջ եկեղեցու կյանքի մեջ։
Վեհափառ Հայրապետն ընդգծել է, որ հանգուցյալ Պապը հատուկ կարևորություն է տվել միջեկեղեցական հարաբերությունների զարգացմանը, կանգնած է եղել ճնշված և անարդարությունից տուժած ժողովրդների կողքին՝ արդարության պաշտպանության դիրքերից։
«Արդարև, ան իր օրինակելի համեստությամբ ու պարզությամբ եղավ «ժողովուրդի Պապը»,–գրել է նա։
Վեհափառ Հայրապետն իր նամակի մեջ նաև անդրադարձել է Պապի կողմից «Հայոց ցեղասպանությունը ճանաչելու քաջ կեցվածքին, ինչպես նաև Արցախի հայության նկատմամբ նա ցուցաբերած զորակցությանը»։
Ֆրանցիսկոս պապի հուղարկավորության արարողությունը կայանալու է ապրիլի 26-ին։ Ամենայն Հայոց կաթողիկոս Գարեգին Երկրորդը նախատեսում է մասնակցել Հռոմի պապի Ֆրանցիսկոսի հուղարկավորությանը։
