«Քաղաքացիական պայմանագիր» խմբակցության պատգամավոր Վլադիմիր Վարդանյանը Ազգային ժողովում ունեցած ելույթում կարծիք է հայտնել, թե ընդդիմադիր ուժերը չափազանցնում են Հայոց ցեղասպանության ուրացման փաստերը։

«Հայաստանում երբևիցե տեսե՞լ եք որևիցե մեկի, որն ուրացել է Հայոց ցեղասպանությունը։ Կարող ենք սրա մասին անընդհատ խոսել, ասել՝ այս հոդվածով քրեական գործ երբևէ հարուցվե՞լ է։ Ես երբեք չեմ տեսել որևէ մարդու Հայաստանում, որ ուրացել է Հայոց ցեղասպանությունը»,- այտարարել է նա։

Նա ընդգծել է, որ նման դեպքերում քրեական գործեր չեն հարուցվել։

Ավելի վաղ «Քաղաքացիական պայմանագիր» խմբակցության պատգամավոր Վահագն Ալեքսանյանն էր հայտարարել, որ Հայաստանի գործող իշխանությունը երբեք չի ուրացել և չի պատրաստվում ուրանալ Հայոց ցեղասպանությունը։

Փաշինյանը Շվեյցարիաում հայ համայնքի հետ հանդիպմանը, անդրադառնալով Հայոց ցեղասպանությանը, ասել էր, որ պետք է հասկանանք, թե «ինչ է եղել և ինչու»։ Ավելի ուշ, ասուլիսում նա հայտարարել է, որ Հայոց ցեղասպանության փաստն անքննելի է և անժխտելի։ Նա նաև հիշեցրել է, որ Հայոց ցեղասպանության ժխտումը, ուրացումը կամ հերքումը ՀՀ քրեական հանցագործություն է։