Հայաստանի ֆուտբոլի ֆեդերացիայի (ՀՖՖ) նախկին նախագահ Ռուբեն Հայրապետյանին պարզաբանել, թե ի՞նչ էր իրականում տեղի ունեցել Թուրքիայի նախագահ Աբդուլլա Գյուլի այցի նախորդ օրերին և ինչու էր Հայաստանի ֆուտբոլի ազգային հավաքականի մարզաշապիկից բացակայել Արարատ լեռան տարբերանշանը, հայտնում է 168.am-ը:

«Կապիտուլյանտներին թվում է, որ Նոյեմբերի 9-ի պայմանագիրը կամ Պրահայի փաստաթուղթը, որով Նիկոլ Փաշինյանն Արցախը հանձնեց և ճանաչեց Ադրբեջանի կազմում, ես եմ ստորագրել… Նախկինում էլ եմ ասել, հիմա էլ եմ ասում՝ ֆուտբոլային դիվանագիտության օրերին մարզաշապիկի վրա Արարատ լեռան տարբերանշանը գնդակով ծածկելն ուղղակի թյուրիմացություն է եղել: Դա իմ մեղքն է եղել, և ես դրա մասին ժամանակին ասել եմ ու ներողություն եմ խնդրել: Կրկնում եմ՝ դա իմ բացթողնման հետևանքն է եղել, և որևէ քաղաքական ենթատեքստ դրանում չկա»,- ասել է Ռուբեն Հայրապետյանը:

Նա հիշեցրել է, որ նույն Թուրքիայում ազգային հավաքականը հանդես է եկել հին մարզաշապիկով, որի վրա հստակորեն երևացել է Արարատ լեռը:

«Ուղղակի արդեն մեզ մոտ նոր մարզաշապիկով են հանդես եկել: Իմ բացթողումն է եղել, էլի եմ շեշտում, Ֆեդերացիայի աշխատակիցներն արել էին, ես էլ չէի հետևել»,- նշել է ՀՖՖ նախկին նախագահը:

Հայրապետյանը պատմել է նաև մի ուշագրավ դրվագի մասին, որը վերաբերում է Թուրքիայի Բուրսա քաղաքում 2009 թվականի հոկտեմբերին ֆուտբոլի աշխարհի 2010թ. ընտրական փուլի Թուրքիա-Հայաստան հանդիպումից առաջ ստեղծված իրավիճակին:

«Մոռանում են, որ նույն Թուրքիայում՝ Բուրսա քաղաքում, 2009թ. հոկտեմբերին, ֆուտբոլի աշխարհի 2010թ. առաջնության ընտրական փուլի Թուրքիա-Հայաստան խաղից առաջ որ թուրք ֆուտբոլասերներին արգելվեց մարզադաշտ մտնել Ադրբեջանի դրոշով, նույն Ֆեդերացիայի նախագահի շնորհքն էր: Եվ սա այն դեպքում, երբ Բուրսայի դատարանը որոշում էր կայացրել, որ կարող են Ադրբեջանի դրոշ տանել մարզադաշտ:

Դիմեցի ՈւԵՖԱ, ասացի՝ հավաքականը մարզադաշտ դուրս չեմ բերի, եթե Ադրբեջանի դրոշ լինի, և մի օրում ՈՒԵՖԱ-ն նոտա հղեց, ու Բուրսայի դատարանը նույն օրն իր որոշումը փոխեց, ու արգելեցին Ադրբեջանի դրոշներով մարզադաշտ մտնել: Մի դրոշ նկատվեց, ոստիկանները ծեծելով մարզադաշտից հանեցին»:

ՀՖՖ նախկին նախագահը ընդգծել է, որ այս միջամտության շնորհիվ հնարավոր է եղել պաշտպանել ազգային հավաքականի իրավունքները և կանխել լարվածության աճը խաղադաշտում:

Ավելի վաղ ՀՀ ԱԺ «Քաղաքացիական պայմանագիր» իշխող խմբակցության ղեկավար Հայկ Կոնջորյանը փորձել էր Հայոց ցեղասպանության ուրացման պատասխանատվությունը դնել ՀՅԴ-ի վրա՝ անդրադառնալով նաև Հայաստանի ֆուտբոլի ազգային հավաքականի մարզաշապիկի վրայից տարիներ առաջ Արարատ լեռան տարբերանշանը հանելու փաստին։