Ամերիկահայ հեռուստաաստղ Քիմ Քարդաշյանն էմոցիոնալ վկայություն է տվել Փարիզի դատարանում՝ պատմելով 2016 թվականին տեղի ունեցած զինված կողոպուտի մասին, երբ դիմակավորված հանցագործները շքեղ հյուրանոցի իր սենյակից գողացել են միլիոնավոր դոլարների արժողությամբ զարդեր։

Հեռուստաաստղը, որին կողոպուտի ժամանակ կապվել և զենքի սպառնալիքի տակ էին պահում, առաջին անգամ դատարանում հանդիպել է ենթադրյալ հանցագործներին՝ ցուցմունք տալով ընթացիկ դատավարության ժամանակ։

Տասը մարդ է մեղադրյալի աթոռին՝ մոտ 10 միլիոն դոլարի արժողությամբ զարդերի զինված կողոպուտի համար, ներառյալ նրա նախկին ամուսին Քանյե Ուեսթից ստացած ադամանդե նշանադրության մատանին, գրում է BBC-ն։

Քարդաշյանը երեք ժամից ավելի խոսել է տեղի ունեցածի մասին։ Նրա ցուցմունքը երբեմն ընդհատվել է երկու մեղադրյալների ներողություններով։

Երբ մեղադրյալներից մեկը՝ 71-ամյա Աոմար Այթ Խեդաշը, ափսոսանք է հայտնել, Քարդաշյանը նրան դիմել և ասել է, որ ներում է նրան։

Հղում անելով ԱՄՆ-ում արդարադատության բարեփոխման իր ակտիվությանը և իրավաբան դառնալու իր ձգտումներին՝ նա շնորհակալություն է հայտնել Խեդաշին նրա ներողության նամակի համար։

«Ես գնահատում եմ դա, ես ներում եմ քեզ»,– ասել է նա դատարանում՝ լաց լինելով։

«Բայց դա չի փոխում զգացմունքները, զգացողությունները և տրավման, ինչպես նաև այն, թե ինչպես է իմ կյանքը փոխվել։

Ես պարզապես ուզում եմ շնորհակալություն հայտնել բոլորին, հատկապես ֆրանսիական իշխանություններին, որ ինձ թույլ տվեցին այսօր վկայություն տալ և պատմել իմ ճշմարտությունը»,–ասել է Քարդաշյանը։

Իրավական գործընթացը, որը վերաբերում է ավելի քան ինը տարի առաջ տեղի ունեցած հանցագործությանը, երկար սպասված էր և մեծ ուշադրություն էր գրավում մամուլի կողմից։

Սև հագուստով և ադամանդե զարդերով Քարդաշյանը ներկայացել է դատարան՝ իր մոր՝ Քրիս Ջենների, ընկերների ու բազմաթիվ անվտանգության աշխատակիցների հետ։

Ցուցմունքի առաջին ժամին նա լարված էր, դադարներ էր անում հուզմունքից։ Ժամանակի ընթացքում նա հանգստացավ, իսկ ձայնը դարձավ վստահ։

Նա ներեց մի մեղադրյալի, ով ներողություն խնդրեց դատարանում։

Քարդաշյանը առաջին անգամ քրեական դատարանում պատմեց կողոպուտի և դրան հաջորդած վախերի մասին։

«Հաստատ համոզված էի, որ կրակելու են ինձ վրա»,–ասել է նա։

Քարդաշյանը պատմել է, որ 2016–ին Փարիզ էր ժամանել նորաձևության շաբաթվա համար հոկտեմբերի 2-ին և մոտ 03:00-ն գնացել էր քնելու, երբ ոստիկանների համազգեստով երկու դիմակավոր են ներխուժել՝ հետները բերելով կապկպված և կապած հյուրանոցի ադմինիստրատորին։

Նա հասցրել է զանգահարել իր թիկնապահին մինչև հեռախոսը խլելը։ Հանցագործները վերցրել են նրա նշանադրության մատանին և «բարձրացրել անկողնուց, տարել միջանցք՝ ավելի շատ զարդեր որոնելու համար»։

Մեկը թիկունքից ատրճանակ էր պահել։ «Այդ պահին մտածեցի՝ փախնե՞մ, բայց դա տարբերակ չէր։ Պարզապես մնացի», ասաց նա՝ հավելելով, որ հասկացավ՝ պետք է հնազանդվել՝ անվտանգ լինելու համար։

Այնուհետև նրան նետել են անկողնուն և կապել։ Նա դիմել է կոնսերժին. «Խնդրում եմ՝ թարգմանիր, որ ես երեխաներ ունեմ, պետք է տուն վերադառնամ»։

Հանցագործներից մեկը քաշել է նրան, խալաթը բացվել է, իսկ տակից նա հագուստ չուներ։ Նա ասել է, որ վախեցել էր բռնաբարությունից ու աղոթել՝ հոգեպես պատրաստվելու համար։ Հետո կապել են նրա ոտքերը և ատրճանակ պահել։

«Հաստատ համոզված էի, որ հենց այդ պահն է, երբ կրակելու են ինձ վրա»,–ասել է հեռուստաաստղը։

Նա մտածել է ընտանիքի մասին և աղոթել, որ նրանք չտեսնեն իր սպանությունը։ Նա վախեցած էր, որ քւյրը՝ Քորթնին, կմտներ սենյակ ու գտներ իր դիակը։

Դատավոր Դավիդ դը Պասը հարցրել է՝ կարծում էր արդյոք, որ կմահանա։

«Իհարկե կարծում էի, որ մահանալու եմ»,–ասել է Քարդաշյանը։

Նա նայել է նրան կապած մարդու աչքերին՝ փորձելով հիշել դեմքը։ Նրան ասել են, որ եթե լուռ մնա՝ ամեն ինչ լավ կլինի։

Երբ կողոպտիչները հեռացել են զարդերով, նրան թողել են լոգարանում։ Նա ազատել է ձեռքերը, իջել աստիճաններով՝ հասնելով իր ոճաբանին՝ Սիմոն Հարուշին, ով օգնել է քանդել մնացած կապերը։

Նրանք դուրս են վազել պատշգամբ, կանչել օգնություն ու թաքնվել թփերում։ Քարդաշյանն ասել է, որ սկզբում չի վստահել ոստիկանությանը, քանի որ հանցագործները նույնպես ոստիկան էին ձևացել։

Դատավորի հարցերին պատասխանելիս նա նշել է, որ այդ գիշեր թիկնապահ չուներ, քանի որ նախկինում իրենց անվտանգ էին զգում։ Թիկնապահները Կորթնիի հետ ակումբում էին, իսկ Քիմ մնացել էր հյուրանոցում։

«Փարիզից հետո ամեն ինչ փոխվեց»,–ասել է նա։

Այժմ նա ունի մինչև վեց թիկնապահ գիշերները, ու տագնապ ունի դուրս գալուց՝ մտածելով, որ եթե դուրսն է, տունը դատարկ է։

«Չեմ կարող քնել, եթե չեմ իմանում, որ մի քանի թիկնապահ ինձ հսկում է»,–ասել է նա։

Նա հիշել է նաև, որ իրենց տունը Լոս Անջելեսում թալանվել էր՝ դեռ Փարիզից վերադառնալուց առաջ։

Քարդաշյանի ցուցմունքը մի քանի անգամ ընդհատվել է՝ երկու մեղադրյալների ներողություններից։ Նա ընդունել է Խեդաշի ներողությունը, բայց անտեսել մյուսներին։

Նա չի արձագանքել նախկին վարորդին՝ Գարի Մադարին, ով կասկածվում է տեղորոշման մասին տեղեկություն փոխանցելու մեջ։ Նա հերքում է մեղադրանքը։

Քարդաշյանը դժգոհել է Յունիս Աբբասից, ով ընդունելով մեղքը՝ գիրք է հրատարակել՝ «Ես կողոպտեցի Քիմ Քարդաշյանին»։

Նա ասել է. «Իրոք շոկի մեջ էի, երբ տեսա, որ գիրք կա»։

«Բավական չէ, որ նա դա արել է, հիմա էլ փող է վաստակում իմ զարդերից, հիշողություններից, հորս տված ժամացույցից։ Դա չեմ կարող վերադարձնել։

Ուզում էի ներկա լինել, քանի որ զոհ եմ այս գործում, ու առաջին անգամ կարող եմ լսել բոլորին։

«Սա իմ գործն է։ Ցանկանում եմ իրավաբան դառնալ ու հավատում եմ՝ բոլորն արժանի են իրենց ճշմարտությունը պատմելուն։ Սա իմ ճանապարհը դեպի անդորր»,–ասել է Քարդաշյանը։

Նա եզրափակել է՝ ասելով, որ իր նպատակը ճշմարտությունը պատմելն է։

«Դա ահավոր էր ու փոխեց կյանքս։ Չեմ ցանկանա դա ոչ մեկին՝ նույնիսկ թշնամուս»,–ասել է հեռուստաաստղը։