ԱՄՆ նախագահ Դոնալդ Թրամփը կրկնել է իր այն հայտարարությունը, թե Իրանի հարցում որոշում է կայացնելու երկու շաբաթում՝ հավելելով, որ դա առավելագույն ժամկետն է։

«Հիմք ընդունելով այն փաստը, որ մոտ ապագայում կարող են կամ չեն կարող լինել էական բանակցություններ Իրանի հետ, ես որոշում կընդունեմ՝ հարվածելու կամ ոչ՝ առաջիկա երկու շաբաթվա ընթացքում», — ասված է Թրամփի հայտարարության մեջ, որը հրապարակել է Սպիտակ տան մամուլի քարտուղար Քարոլայն Լևիթը, գրում է NBC News-ը։

NBC News-ի վերլուծության համաձայն՝ Թրամփը միայն վերջին երկու ամիսներին ավելի քան տասն անգամ նշել է «երկու շաբաթ» ժամկետ տարբեր որոշումների ու քայլերի համար։ Այս միտումը սկսվել է նրա նախագահության սկզբից։

Օրինակ՝ 2017 թվականի փետրվարի 9-ին նա ասել է. «Մենք կբացահայտենք մի բան, ես կասեի առաջիկա երկու կամ երեք շաբաթում, որը հրաշալի կլինի հարկային քաղաքականության և ավիացիոն ենթակառուցվածքների զարգացման առումով»։ Այնուամենայնիվ, Bloomberg-ի տվյալներով՝ այդ ծրագրից ընդամենը մեկ էջ է ներկայացվել միայն 11 շաբաթ անց։

Իր նախագահության ընթացքում Թրամփը մշտապես խոստումներ է տվել առողջապահության և ենթակառուցվածքների մասին՝ նույն ժամկետով, սակայն դրանք երբեք չեն իրականացվել։ Վերջին շաբաթներին նրա այս մոտեցումը նոր թափ է ստացել՝ ներառելով մի շարք հարցեր՝ սկսած առևտրային գործարքներից և մաքսատուրքերից մինչև Ռուսաստան-Ուկրաինա հակամարտությունը։ Սակայն այս հայտարարություններից շատերը մնում են չիրագործված, իսկ բազմաթիվ հարցեր՝ անպատասխան։

Սպիտակ տունը չի արձագանքել մեկնաբանություն տալու խնդրանքին։

Թրամփը նաև ասել է, թե Եվրոպան չի կարող մեծ դերակատարություն ունենալ Իսրայել–Իրան հակամարտության կարգավորման մեջ։

Նա նաև քննադատել է Ազգային հետախուզության տնօրեն Թուլսի Գաբարդին, ով պնդել էր, որ ապացույց չկա, թե Իրանը միջուկային զենքի ստեղծման շեմին է, գրում է The Jeruselem Post–ը։

Նյու Ջերսիի Մորրիսթաունի օդանավակայանում լրագրողների հետ զրույցում Թրամփը վիճարկել է ԱՄՆ–ի հետախուզական տվյալները։

«Նա սխալվում է», — հայտարարել է Թրամփը՝ անդրադառնալով Գաբարդի մարտ ամսվա ելույթին, որտեղ վերջինս հայտնել էր, որ ԱՄՆ ծառայությունները կարծում են, որ Իրանն այս ու մոտակա տարիների ընթացքում միջուկային զենք չի արտադրի։

Reuters-ի մի աղբյուր, որը ծանոթ է ԱՄՆ հետախուզական զեկույցներին, հաստատել է, որ գնահատականները չեն փոխվել։ ԱՄՆ գաղտնի ծառայությունները նաև կարծիք ունեն, որ մոտ երեք տարի կպահանջվի Իրանից զենքն արտադրելու և կիրառելու համար, սակայն որոշ փորձագետներ հավատում են, որ Իրանը կարող է կառուցել և տեղադրել դատարկ միջուկային զենք ավելի կարճ ժամանակում։

ԱՄՆ նախագահ Դոնալդ Թրամփը հայտարարել է, որ կարող է աջակցել զինադադարին Իսրայելի և Իրանի միջև՝ «կախված պայմաններից»։

Նա նաև կասկած է հայտնել, որ Եվրոպան կկարողանա էական դեր խաղալ Իսրայելի և Իրանի միջև հակամարտությունում։ «Իրանը չի ցանկանում խոսել Եվրոպայի հետ։ Նրանք ուզում են խոսել մեզ հետ։ Եվրոպան այս հարցում չի կարող օգնել», — ասել է Թրամփը։

Նրա այս մեկնաբանություններին զուգահեռ Իրանի արտգործնախարարը Ժնևում հանդիպել է եվրոպացի գործընկերների հետ՝ փորձելով դիվանագիտական ճանապարհով առաջ մղել բանակցությունները Իրանի միջուկային ծրագրի վերաբերյալ։ Եվրոպացի նախարարները հորդորել են Թեհրանին համագործակցել Վաշինգտոնի հետ, սակայն քննարկումներն էական առաջընթաց չեն գրանցել։

Երբ հարցրել են, արդյոք Իրանի դեմ պայքարում անհրաժեշտ կլինեն ցամաքային ուժեր, Թրամփը պատասխանել է. «Ես չեմ խոսի ցամաքային ուժերի մասին, որովհետև դա վերջին բանն է, որը դուք կցանկանայիք»։

Թրամփը և Սպիտակ տունը հայտարարել են, որ առաջիկա երկու շաբաթների ընթացքում կորոշեն՝ ներգրավվել ԱՄՆ-ը պատերազմի մեջ, թե ոչ։ Տրանփը փոխում է իր հայտարարությունները՝ մեկ անգամ առաջարկելով արագ դիվանագիտական լուծում, մեկ անգամ՝ ակնարկելով, որ Վաշինգտոնը կարող է միանալ Իսրայելին։

Իսրայելը, որը Մերձավոր Արևելքում միակ պետությունն է, որին համարում են միջուկային զենք ունեցող, հայտարարել է, որ իր հարվածները նպատակ ունեն կանխել Իրանի կողմից այդ զենքի ստեղծումը։ Իրանը, որը ստորագրել է Միջուկային զենքի չտարածման պայմանագիրը, պնդում է, որ իր միջուկային ծրագիրը բացառապես խաղաղ է և պատասխանել է հրթիռային հարվածներով։

Իրանում մարդու իրավունքների ակտիվիստների լրատվական գործակալության տվյալներով՝ իսրայելական հարվածների արդյունքում զոհվել է 639 մարդ։ Իսրայելը հայտարարել է, որ Իրանի հարվածների հետևանքով զոհվել է 24 քաղաքացիական անձ։