Հայաստանից արտահանվող գյուղմթերքը վերջին շրջանում չի համապատասխանել Ռուսաստանի և ԵԱՏՄ պահանջներին, հայտարարել է «Ռոսսելխոզնադզորը»:
Գերատեսչությունում նաև ենթադրել են, որ Հայաստանի էկոնոմիկայի նախարարությունը լիարժեք չի իրականացնում այն գործառույթները, որ իրեն են փոխանցվել գյուղնախարարության լուծարումից հետո, գրում է ՌԲԿ-ն։
«Հաշվի առնելով, որ Ռուսաստանը հայկական գյուղատնտեսական արտադրանքի իրացման հիմնական շուկան է, ինչպես նաև այն, որ վերջին շրջանում Հայաստանից մատակարարվող արտադրանքը չի համապատասխանում ԵԱՏՄ-ի և Ռուսաստանի ֆիտոսանիտարական պահանջներին, կարելի է ենթադրել, որ Հայաստանի էկոնոմիկայի նախարարությունը չի կարողանում կատարել այն լիազորությունները, որոնք իրեն վերապահվել են գյուղատնտեսության նախարարության լուծարումից հետո», — հայտարարել են գերատեսչությունում։
2019 թվականին Հայաստանում լուծարվել է գյուղատնտեսության նախարարությունը, և ոլորտի հարցերով զբաղվում է էկոնոմիկայի նախարարությունը։
Մայիսի 30-ից սահմանափակվելու է Հայաստանից Ռուսաստան բանջարեղենի և մրգերի ներմուծումը։ Ավելի վաղ սահմանափակող միջոցները վերաբերել են նաև հայկական ծաղիկներին, «Ջերմուկ» հանքային ջրին, ինչպես նաև հայկական երեք արտադրողների կոնյակին և գինուն։
