Եթե Ռուսաստանը չի ճանաչում Վրաստանի ինքնիշխանությունն իր տարածքի 20 տոկոսի նկատմամբ, ապա ԵՄ ներկայացուցիչ Կայա Կալասը չի ճանաչում Վրաստանի ինքնիշխանությունն իր տարածքի 100 տոկոսի նկատմամբ, հայտարարել է Վրաստանի վարչապետ Իրակլի Կոբախիձեն: Նա այդպես է մեկնաբանել ԵՄ արտաքին քաղաքականության և անվտանգության հարցերով բարձր ներկայացուցչի հայտարարությունը։

«Սա միանգամայն ամոթալի վերաբերմունք է»,-ասել է նա, գրում է «Գրուզիա Օնլայն»-ը:

Նրա խոսքով, այն որ ԵՄ ներկայացուցիչը չի ճանաչում Վրաստանի ժողովրդի կամքը և դեմ է հանդես գալիս դրան, չափազանց լուրջ երևույթ է և պահանջում է լուրջ գնահատական:

«Դա անհեթեթություն է: Դուք հիանալի գիտեք, որ Վրաստանն է 7 երկիր միացնում Սև ծովի, Արևմուտքի հետ, սակայն այդ 7 երկրի նախարարները հրավիրվել էին հանդիպման, իսկ Վրաստանի նախարարը ոչ»,-ասել է նա։

Կայա Կալասը Բրյուսելում լրագրողների հետ զրույցում հայտարարել է, որ Եվրոպական միությունը ցանկանում է աջակցել ոչ թե Վրաստանի կառավարությանը, այլ վրաց ժողովրդին։

«Մենք գործնականում կապ չունենք Վրաստանի կառավարության հետ, մենք չենք ուզում նրան սատարել, մենք ուզում ենք աջակցել վրաց ժողովրդին»,-ասել է Կալասը: