Հայաստանում 2026 թվականի հունվար-հունիսին տնտեսական ակտիվության ցուցանիշը նախորդ տարվա նույն ժամանակահատվածի համեմատ աճել է 7․9 տոկոսով։ Համապատասխան տվյալները հրապարակել է ՀՀ վիճակագրական կոմիտեն։

Հունիսին տնտեսական ակտիվության ցուցանիշը մայիսի համեմատ աճել է 4․4 տոկոսով, իսկ 2025 թվականի հունիսի համեմատ՝ 7․7 տոկոսով, հայտնում է Արմենպրեսը:

Աճի տեմպերով առաջատարը շարունակել է մնալ շինարարության ոլորտը։ Այս տարվա հունվար-հունիսին շինարարության ծավալը նախորդ տարվա նույն ժամանակահատվածի համեմատ աճել է 24․5 տոկոսով և գնահատվել 282 մլրդ 220 մլն դրամ։ Հունիսին՝ մայիսի համեմատ, շինարարության ծավալն ավելացել է 19․5 տոկոսով՝ հասնելով 74 մլրդ 883․4 մլն դրամի։ 2025 թվականի հունիսի համեմատ աճը կազմել է 25․4 տոկոս։

Աճի ցուցանիշով երկրորդ տեղում հայտնվել է ծառայությունների ոլորտը՝ առանց առևտրի։ Առաջին կիսամյակում ծառայությունների ծավալը նախորդ տարվա նույն ժամանակահատվածի համեմատ աճել է 11 տոկոսով և կազմել 2 տրլն 148 մլրդ 598․5 մլն դրամ։ Հունիսին ծառայությունների ծավալը մայիսի համեմատ ավելացել է 5․7 տոկոսով, իսկ 2025 թվականի հունիսի համեմատ՝ 19․7 տոկոսով։ Հունիսյան ցուցանիշը կազմել է 414 մլրդ 966․7 մլն դրամ։

Արդյունաբերական արտադրանքի ծավալը հունվար-հունիսին նախորդ տարվա նույն ամիսների համեմատ ավելացել է 10․8 տոկոսով՝ կազմելով 1 տրլն 522 մլրդ 502․1 մլն դրամ։ Միաժամանակ հունիսին՝ մայիսի համեմատ, արտադրության ծավալը նվազել է 3․1 տոկոսով, սակայն 2025 թվականի հունիսի ցուցանիշը գերազանցել է 4 տոկոսով։ Հունիսին արտադրվել է 256 մլրդ 702․6 մլն դրամի արդյունաբերական արտադրանք։

Առևտրաշրջանառությունն առաջին վեց ամիսներին նախորդ տարվա նույն ժամանակահատվածի համեմատ աճել է 0․9 տոկոսով՝ հասնելով 3 տրլն 155 մլրդ 866 մլն դրամի։ Հունիսին՝ մայիսի համեմատ, առևտրի ծավալն ավելացել է 6․3 տոկոսով, մինչդեռ նախորդ տարվա հունիսի համեմատ նվազել է 0․1 տոկոսով։ Հունիսին առևտրաշրջանառությունը կազմել է 585 մլրդ 949․6 մլն դրամ։

Գյուղատնտեսության համախառն արտադրանքի ծավալն առաջին կիսամյակում, հակառակ ընդհանուր տնտեսական աճին, նվազել է։ Նախորդ տարվա նույն ժամանակահատվածի համեմատ անկումը կազմել է 11․9 տոկոս, իսկ արտադրանքի ծավալը գնահատվել է 310 մլրդ 50․5 մլն դրամ։

Սպառողական գների ինդեքսը հունվար-հունիսին նախորդ տարվա նույն ամիսների համեմատ բարձրացել է 4․6 տոկոսով։ Հունիսին՝ մայիսի համեմատ, ցուցանիշը նվազել է 0․5 տոկոսով, իսկ 2025 թվականի հունիսի համեմատ աճել է 5․1 տոկոսով։

Արդյունաբերական արտադրանքի գների ինդեքսն առաջին կիսամյակում նախորդ տարվա նույն ժամանակահատվածի համեմատ աճել է 8․9 տոկոսով։ Հունիսին մայիսի համեմատ գրանցվել է 0․2 տոկոս աճ, իսկ 2025 թվականի հունիսի համեմատ՝ 8․8 տոկոս։

Հայաստանում հունվար-հունիսին արտադրվել է 4 մլրդ 657․5 մլն կիլովատ/ժամ էլեկտրաէներգիա, ինչը նախորդ տարվա նույն ժամանակահատվածի ցուցանիշը գերազանցել է 7․7 տոկոսով։ Հունիսին՝ մայիսի համեմատ, էլեկտրաէներգիայի արտադրությունն ավելացել է 1 տոկոսով, իսկ նախորդ տարվա հունիսի համեմատ՝ 7․7 տոկոսով։ Հունիսին արտադրվել է 663․5 մլն կիլովատ/ժամ էլեկտրաէներգիա։

Նշված ցուցանիշում ներառված չի եղել էլեկտրաէներգիայի փոխհոսքերի մասով ինքնավար արտադրողների արտադրած էլեկտրաէներգիան։ Համադրելիությունն ապահովելու համար աճի տեմպերը հաշվարկելիս այն ներառված չի եղել նաև նախորդ ժամանակաշրջանների համանուն ցուցանիշներում՝ մայիսին՝ 579․8, հունիսին՝ 616․2։

Հաշվետու ժամանակահատվածի միջին ամսական անվանական աշխատավարձի վերաբերյալ տվյալներ չեն հրապարակվել։