Ռուսաստանի իշխանությունները Telegram-ի համահիմնադիր Պավել Դուրովի միջազգային հետախուզում են հայտարարել։ Ինչպես նշված է ԱԴԾ Հասարակայնության հետ կապերի կենտրոնի հաղորդագրության մեջ, որը հրապարակվել է հուլիսի 29-ին, Ռուսաստանում նրան մեղադրում են «ահաբեկչական գործունեությանը նպաստելու» համար։

Ռուսական հատուկ ծառայությունների վարկածով՝ մեղադրանքները կապված են այն հանգամանքի հետ, որ Telegram-ի ղեկավարությունը չի հեռացնում մեսենջերի այն ալիքները, զրույցները և բոտերը, որոնք, ինչպես պնդվում է, ակտիվորեն օգտագործվում են «ուկրաինական հատուկ ծառայությունների, ահաբեկչական և ծայրահեղական կազմակերպությունների» կողմից՝ Ռուսաստանի տարածքում «դիվերսիոն-ահաբեկչական գործողությունների, զանգվածային սպանությունների, կիբերխարդախ գործունեության իրականացման» նախապատրաստման և համակարգման համար, գրում է Deutsche Welle-ն:

Ըստ ԱԴԾ նյութերի, 2022 թվականից ի վեր Ռուսաստանում գրանցվել է Telegram-ի օգտագործմամբ կատարված 153 հազար հանցագործություն։ Դրանց թվում նշվում են «Կրոկուս Սիթի Հոլ»-ում տեղի ունեցած ահաբեկչությունը, Դարյա Դուգինայի, բլոգեր Մաքսիմ Ֆոմինի (Վլադլեն Տատարսկի) սպանությունները, ինը բարձրաստիճան զինվորականների, այդ թվում՝ գեներալ-լեյտենանտ Իգոր Կիրիլովի սպանությունը, ինչպես նաև զինկոմիսարիատներում պայթյունների և հրկիզումների կազմակերպումը։

ԱԴԾ պնդմամբ՝ «Ռոսկոմնադզորը» Պավել Դուրովի թիմին ուղարկել է ավելի քան 150 հազար պահանջ՝ «անօրինական բովանդակությունը» հեռացնելու վերաբերյալ, սակայն, ինչպես նշվում է, այդ դիմումները մնացել են առանց կատարման։

Իր հերթին, «Ինտերֆաքս» գործակալությունը, հղում կատարելով իրավապահ մարմիններին, հայտնել է, որ 2026 թվականի սկզբից Telegram-ը Ռուսաստանում տուգանվել է ընդհանուր առմամբ ավելի քան 100 միլիոն ռուբլու չափով։ Գործակալության տվյալներով՝ տուգանքների մեծ մասը նշանակվել է Ռուսաստանում արգելված բովանդակությունը չհեռացնելու համար։

Միևնույն ժամանակ, հուլիսի սկզբին ֆրանսիական լրատվամիջոցները հայտնել էին, որ Պավել Դուրովը հերթական անգամ հարցաքննվել է Փարիզում՝ մեսենջերի հնարավոր առնչության վերաբերյալ քրեական գործունեությանը վերաբերող քննության շրջանակում։ Այդ տվյալներով՝ նոր հարցաքննությունը տևել է ավելի քան վեց ժամ և դարձել է արդեն չորրորդը՝ 2024 թվականին նրան մեղադրանք ներկայացվելուց հետո։

Ֆրանսիայում Telegram-ի հիմնադրին մեղադրում են մեսենջերում բովանդակության ոչ բավարար վերահսկողության և իրավապահ մարմինների հետ համագործակցելուց խուսափելու մեջ։ Ֆրանսիացի քննիչների կարծիքով՝ դա կարող է Դուրովին դարձնել այնպիսի հանցագործությունների հանցակցի, ինչպիսիք են մանկական պոռնոգրաֆիայի տարածումը, թմրամիջոցների ապօրինի շրջանառությունը և խարդախությունը։