27 օգոստոսի 2009 - 18:54 AMT
Արդյո՞ք ԵԱՀԿ ՄԽ համար ընդունելի կլինի «Երեւանյան սկզբունքների» ռացիոնալիզմը
Հայաստանի Դեմոկրատական կուսակցությունը (ՀԴԿ) ղարաբաղյան կարգավորման վերաբերյալ առաջարկների նոր փաթեթ է մշակել, որը մտադիր է ներկայացնել ՀՀ նախագահ Սերժ Սարգսյանին, այսօր Երեւանում կայացած մամլո ասուլիսին հայտնել է ՀԴԿ առաջնորդ Արամ Սարգսյանը: Ինչպես ընդգծել է Սարգսյանը, կուսակցությունն առաջարկում է հրաժարվել «Մադրիդյան սկզբունքներից» եւ դրանք փոխարինել «Երեւանյան սկզբունքներով», որոնցում նոր մոտեցումներ են ներկայացված հակամարտության կարգավորման վերաբերյալ:
Արամ Սարգսյանն անընդունելի է համարում ղարաբաղյան հակամարտության կարգավորման շուրջ հետագա բանակցությունները վարել Հայաստանի ու Ադրբեջանի նախագահների միջեւ ձեռք բերված պայմանավորվածությունների հիման վրա, որոնցում Հայաստանի համար վտանգավոր զիջումներ են պարունակվում:
ՀԴԿ առաջնորդը լրագրողներին ծանոթացրել է առաջարկվող փաստաթղթի նոր, կոնցեպտուալ մոտեցումներին, որոնք ամփոփված են 3 կետերում, որոնց համաձայն հակամարտության կողմերի միջեւ պետք է համաձայնագիր ստորագրվի մինչեւ բանակցային գործընթացի ավարտը հաշտեցման մասին, երկու երկրների հասարակայնությունների միջեւ վստահության մթնոլորտ ստեղծելու համար հատուկ ծրագրերի իրականացումը եւ Լեռնային Ղարաբաղի ներգրավմամբ տնտեսական ծրագրերի իրականացման մեկնարկը:
Արամ Սարգսյանը գտնում է, որ նոր «Երեւանյան սկզբունքները» կարող են հիմք դառնալ կողմերի` թշնամական քարոզչությունից հրաժարվելու համար, որը երկու հասարակություններում համապատասխան տրամադրություններ է խմորում, եւ թույլ կտա առավել լիարժեք բանակցություններ վարել հակամարտության խաղաղ լուծման շուրջ: