Եվրամիությունը մտահոգություն է հայտնել Թուրքիայում տեղի ունեցած բարձրաստիճան զինվորականների ձերբակալությունների կապակցությամբ: Նրանք մեղադրվում են պետական հեղաշրջում նախապատրաստելու մեջ: Եվրամիության ընդլայնման պատասխանատու, Եվրահանձնաժողովի անդամ Շտեֆան Ֆյուլեի հայտարարությունում կոչ է արվում այդ գործի վերաբերյալ «ազնիվ դատավարություն» անցկացնել:

Փետրվարի 24-ին ստեղծված իրավիճակի կապակցությամբ Անկարայում թուրքական բանակի պետական շտաբում տեղի ունեցավ ռազմական ղեկավարության արտակարգ նիստ, հաղորդում է Ազատություն ռադիոկայանը:
Թուրքիայում պետական հեղաշրջում նախապատրաստելու մեղադրանքով փետրվարի 22-ին ձերբակալվել են տասնյակ բարձրաստիճան սպաներ, ներառյալ Թուրքիայի ռազմական ուժերի պետշտաբի պաշտոնաթող գեներալ Էրգին Սայգունին:

Ձերբակալվածների թվում են նաեւ ՌՕՈւ-ի նախկին հրամանատար, բանակի պաշտոնաթող գեներալ Իբրահիմ Ֆըրթինը, ՌԾՈւ-ի նախկին հրամանատար պաշտոնաթող ծովակալ Օզգեն Օմեկը, պաշտոնաթող գեներալ Էնգին Ալանը: Ձերբակալվել է 10-ը գնդապետ, 4 ծովակալ, 17 գեներալ: Նրանց թվում կան ինչպես պաշտոնաթող, այնպես էլ ծառայող զինվորականներ: Զինվորականների ձերբակալման գործողությունները անցկացվել էին Ստամբուլում, Անկարայում եւ Իզմիրում: Ընդհանուր առմամբ դավադրության մեղադրանքով ձերբակալվել է մոտ 50 հոգի: