Ընթացիկ տարվա հունիսից սպառողները կկարողանան ձեռք բերել Microsoft Office 2010 ծրագիրը: Այդ մասին այսօր Երևանում լրագրողներին հաղորդեց Հայաստանում Microsoft-ի ներկայացուցչության տնօրեն Գրիգոր Բարսեղյանը: Ընդ որում, նա ճշտեց, որ ընկերության կորպորատիվ հաճախորդներն արդեն օգտվում են նոր ծրագրից:
«Microsoft Office 2010 փորձնական տարբերակն արդեն մի քանի ամիս առաջ է տեղակայվել ընկերության ինտերնետ-կայքում, և մինչև հոկտեմբեր կարելի է անվճար օգտվել դրանից, ծանոթանալու համար բազմաթիվ փոփոխությունների ու նորամուծությունների հետ»,- ասաց Microsoft-ի ներկայացուցչության տնօրենը:
Microsoft Office 2010 սովորական տարբերակները կարժենան մոտ $150, կներառեն լիցենզիաներ երեք օգտվողների համար, իսկ Microsoft Office 2010 Enterprise-ը կարժենա մոտ $500-600:
Գրիգոր Բարսեղյանը հիշեցրեց նաև, որ ներկա պահին Երևանի խանութներում վաճառվում է Windows 7 օպերացիոն համակարգը, որն իր մեջ ներառում է մի շարք ծրագրերի փաթեթներ, այդ թվում` հակավիրուսային ծրագիր և արժե 24,5 հազ. դրամ:
